Empreza Tula-Eli konklui projetu eletrifikasaun ba komunidade Uetali
VIKEKE, 24 Jullu 2025 (TATOLI)—Koordenadór Eletricidade de Timor-Leste, Empreza Públika (EDTL, E.P.), Ernesto Sarmento informa Empreza Tul-Eli Unipessoal, Lda konklui ona projetu eletrifikasaun ba komunidade Uetali, Suku Uma Ua’in Kraik, Postu Administrativu Vikeke Vila, Munisípiu Vikeke.
“Projetu eletrifikasaun tinan 2025 ba komunidade Uetali, empreza responsavel konklui ona sira-nia servisu, instala ona ahi ba komunidade nia uma. Nune’e, daudaun ne’e empreza sei bá faze retensaun kuaze tinan ida,” Ernesto Sarmento ba TATOLI iha Postu Vikeke Vila, Kinta ne’e.
Ernesto aprofunda katak daudaun ne’e populasaun Uetali ne’ebé uluk la asesu ba eletrisidade, agora empreza instala ona ba populasaun sira-nia uma, postu saúde, kapela no eskola.
“Agora ita-nia populasaun sira asesu ona enérjia eletrisidade. Kona-ba inaugurasaun ne’e ita hein de’it nasionál,” nia hato’o.
Notísia relevante: https://tatoli.tl/2023/12/07/abitante-uetali-viqueque-seidauk-asesu-eletrisidade/
Iha fatin ketak, Diretóra Empreza Tula-Eli Unip, Lda, Joaninha da Costa Soares hateten empreza nia devér konklui ona servisu, maibé sei iha faze retensaun ba tinan ida.
“Ami hahú servisu iha loron 17 fulan-Marsu 2025, ramata servisu iha fulan-Juñu 2025. Ami konklui ona ami-nia servisu. Maski ramata ona, sei iha faze retensaun hahú husi loron 29 Juñu 2025 halo lakan ona eletrisidade,” diretora ne’e relata.
Nia haktuir katak daudaun ne’e empreza instala ona ba uma-kain totál hamutuk 435, gasta orsamentu hamutuk $501.336,29. Enkuantu, servisu eletrifikasaun ne’e envolve traballadór hamutuk na’in-18.
Jornalista: Vitorino Lopez da Costa
Editór: Xisto Freitas da Piedade
