VIKEKE, 24 Jullu 2025 (TATOLI)—Food and Agriculture Organization (FAO) liuhusi projetu konservasaun agrikultura apoia hand-tractor ki’ik unidade 11 ba grupu agrikultura hamutuk 11 iha Munisípiu Vikeke.
Reprezentante FAO iha Munisípiu Vikeke, Zaulino Sarmento Gomes haktuir hand-tractor ne’ebé FAO oferese ba grupu sira-ne’e atu fasilita atividade agrikultura ne’ebé grupu sira implementa.
“Tratór ne’e atu fasilita atividade konservasaun agrikultura hanesan halo to’os no natar. Antes ne’e, ami halo uluk sosializasaun ba grupu sira hodi implementa konservasaun agrikultura, depoiz ami halo monitorizasaun ba grupu sira-nia atividade referida, hafoin ami apoiu tratór,” Zaulino ba TATOLI iha Postu Administrativu Vikeke Vila, Kinta ne’e.
“Iha Munisípiu Vikeke ami harii grupu hamutuk 42. Númeru ne’e grupu balun simu uluk ona ekipamentu agrikultura nian inklui hand-tractor. Agora mak ami distribui tan ba grupu 11. Kada grupu tratór ida,” nia hato’o.
Zaulino subliña FAO sei kontinua halo monitorizsaun ba grupu sira-nia atividade hodi garante sustentabilidade grupu nian iha futuru.
Iha fatin hanesan, Koordenadór Grupu Aidak Manu Uman husi Suku Luka, Vikeke Vila, Mariano Mendonça haktuir Grupu Aidak Manu Uman hetan hand-tractor ida husi FAO hodi reforsa atividade ortikultura.
“Ami-nia Grupu implementa atividade ortikultura hanesan kuda batar, kuda fore-metan no foremungu. Ha’u hanoin apoia hand-tractor ida-ne’e la sufisienta ba ami tanba ami-nia toos luan, maibé ami nafatin agradese ba FAO tanba apoia ona ekipamentu hodi haboot ami-nia atividade ortikultura,” nia tenik.
Grupu Aidak Manu Uman husi Suku Luka ho totál membru hamutuk na’in-26 ne’ebé daudaun ne’e implementa atividade ortikultura iha Suku Luka.
Tuir dadus, distribuisaun hand-tractor ba grupu 11 kompostu husi Postu Uatulari grupu ida hetan hand-tractor ida, Ossú hetan rua no Postu Vikeke Vila hetan ualu (8).
Jornalista: Vitorino Lopez da Costa
Editór: Xisto Freitas da Piedade
