DILI, 24 Jullu 2025 (TATOLI)-Ekipa voleiból maskulina husi Portugál hetan primeiru lugár hafoin manán kontra Kabuverde iha Jogu Desportivu Komunidade País Ko’alia Lian Portugés (CPLP) ba Edisaun da-12.
Dupla portugés ne’ebé reprezenta husi Tito (1) no Luís Filipe (2) ne’e halakon nia adversáriu kabuverdianu Denzel Ramos (1) no Micael Barbosa.
Portugál ne’ebé sempre hatudu forsa iha inísiu jogu ne’e, marka kedas pontu 10 hafoin adversáriu Kabuverde halo kontra-atake ho marka pontu ida. Maibé Portugál ne’ebé sempre pasa bola ho di’ak, kalma no domina bola lahatudu nia frakeza no kontinua hasa’e nia pontu
Jogu ne’ebé realiza iha tuku 19h00 kalan no la’ós iha loron-manas nia laran, halo selesaun portugeza ne’e aumenta forte liután no hamate kada passing husi Kabuverde. Nune’e, iha set dahuluk Portugál manán ho pontu dook liu 21 no Kabuverde 4.
Kontinua ba parte daruak nian, ekipa Kabuverde koko marka uluk pontu lima, hafoin Portugál tuir, maibé dupla portugés ne’e aumenta liután sira-nia tátika oioin hodi hasa’e sira-nia pontu.
Iha jogu ikus ne’e, iha oportunidade ba Kabuverde atu manán maibé jogadór Denzel Ramos baku bola balu la liu rede ho ida-ne’e aumenta pontu ba Portugál. Nune’e Portugál hamate Kabuverde ho pontu 21-11.
Treinadór Ekipa Voleiból Praia Portugál, Nuno São Tiago, hateten rezultadu ne’e hanesan orgullu ida ba nia nu’udar treinadór.
Tuir nia, rezultadu ida-ne’e refleta duni atleta Portugál sira-nia esperansa antes no otimista manán iha jogu ne’e.
“Rezultadu ne’e ami satifas tebes tanba ami fiar ami-nia an katak sei manán jogu ne’e, no lori fila medalla osan-mean ba ami-nia rai”, dehan.
Atleta Tito Oliveira mós kontente tanba sira-nia ekipa bele manán iha jogu ida-ne’e nu’udar reprezentante Portugál.
Notísia relevante: Portugál sai kampeaun voleiból praia mistu hafoin halakon Timor-Leste
Jornalista: Arminda Fonseca
Editora: Maria Auxiliadora
