DILI, 24 Jullu 2025 (TATOLI) – Atleta Portugál okupa primeiru lugar iha singular maskulinu (mane), femininu (feto) no pár mistu iha jogu finál ba modalidade tenis kampu, iha ámbitu jogu desportivu CPLP ba dala-XII iha Timor-Leste (TL).
Singular feminina primeiru lugar okupa husi atleta Sofia Ferreira da Silva no hetan medalla bronze, Beatriz Angelico hetan medalla ouru no maskulinu singular okupa husi Lourenço Coreira no hetan medalla bronze, António Rodrigues ho medalla ouru.
Par mistu, atleta portugés naran Sofia Ferreira da Silva ho António Rodrigues simu medalla bronze no Beatriz Angelico ho Lourenço Correira simu medalla ouru.
Enkuantu segundu lugar monu ba Mosambike. Atleta vensedór sira mak hanesan feminina singular okupa husi atleta Leticia Jandamela ho medalla prata, depois iha jogu maskulinu singular ho naran Amin Rosa hetan medalla prata. Husi ne’e, jogu pár mistu husi Mosambike ho naran Leticia Jandamela ho Amin Rosa simu medalla prata.
Tuirmai, Atleta husi Angola femenina singular ho naran Filomena Gonçalves hetan medalla bronze no Timor-Leste maskulinu singular ho naran Frans da Silva hetan medalla bronze no pár mistu husi Timor-Leste ho naran Graciabeth Valosa ho Frans da Silva hetan medalla bronze.
Atleta tenis Portugés Beatriz Angélico hatudu entuziazmu no konfiansa hafoin partisipa iha torneiu internasionál tenis nian no konsege hetan rezultadu ne’e. “Ha’u iha esperansa di’ak no hein atu kontinua joga hanesan ne’e,” Beatriz otimista.
Torneiru sira hanesan ne’e, tuir tenista ne’e katak la’ós primeira-vez nia partisipa fora husi Portugál. Maske nune’e nia destaka novidade no dezafiu atu kompete iha ambiente internasionál jogu desportivu CPLP.
“Lae! La’ós ba dala uluk, maibé ho desportu barak iha ne’ebá no do’ok tebes husi uma, do’ok tebes husi Portugál. Sim, ne’e ba dala uluk”, nia komenta.
Kona-ba nia istória iha kompetisaun sira ne’ebé hanesan, Beatriz rekoñese katak kompetisaun iha Timor-Leste iha ámbitu jogu desportivu CPLP no manan ne’e hanesan realizasaun espesiál ida.
“Ha’u nunka konsege to’o do’ok tebes. Ha’u sei liu ronde ida ka rua, maibé ha’u nunka konsege to’o dook hanesan agora,” nia revela.
Torneiu ida-ne’e reforsa ninia poténsia no husik perspetiva di’ak ba jogadór ténis joven ne’e nia futuru iha sirkuitu internasionál.
Nune’e mós, Joven atleta Portugés António Rodrigues sente haksolok tebes hafoin hetan primeiru lugar iha torneiu internasionál ténis nian ne’ebé hala’o iha ámbitu CPLP. “Hanesan sentimentu di’ak ida hodi reprezenta Portugál. Ha’u hanoin katak ha’u joga di’ak tebes. Ha’u disiplinadu tebes iha enkontru ne’e”, nia subliña.
Atleta ne’e destaka dezafiu kompetitivu no difikuldade sira hodi adapta ba kondisaun kampu nian.
“Kampu ida-ne’e lais liu duké kampu sira iha Portugál, nó susar atu adapta. Maibé, ha’u joga di’ak tebes iha enkontru ida-ne’e”, nia haktuir.
Atleta ne’e hateten mós katak vitória ne’e maka rezultadu hosi esforsu ne’ebé konsistente no dezempeñu ne’ebé sólidu iha torneiu tomak. Atu taka, joven atleta portugés ne’e oferese agradesimentu ida-ne’ebé simples maibé signifikativu.
Entretantu, iha jogu modalidade tenis ne’e, entrega medalla ba atleta sira mak Ministru Administrasaun Estatál (MAE), Sekretariu Estadu Arte no Kultura (SEAK), Embaixadór Mosambike, Empreza bee Leste no Prezidente Federasaun Tenis Timor-Leste.
Jornslista : Felicidade Ximenes
Editór: Rafael Ximenes de A. Belo
