DILI, 24 Jullu 2025 (TATOLI)—Vítima inséndiu iha Suku Weru-Mata, Postu Administrativu Laga, Munisípiu Baukau hetan ona apoia emerjénsia husi Autoridade Protesaun Sivíl (APC-sigla portugeza).
Komandante Operasionál APC Munisípiu Baukau, Francisco Viana Freitas esplika hafoin akontesimentu inséndiu, ekipa bomberiu to’o kedas iha lokál akontesimentu hodi kombate ahi ba uma haat ne’ebé estragadu no evakua vítima sira bá fatin seguru.
“Ita distribui ona apoia emerjénsia ba vítima sira no verifika ona dadus,” Komandante Operasionál APC Munisípiu Baukau informa ba TATOLI liuhosi telefónema, Kinta ne’e.
Viana haktuir katak kazu referidu akontese iha Domingu (20/07), iha-ne’ebé kauza husi ahi haan duut no afeta ba nuu-tahan nune’e alastra bá komunidade nia uma tolu no baraka ida.
Vítima inséndiu hamutuk xefe família neen ho membru família 26 hetan apoia emerjénsia hanesan hahán, ekipamentu koziña, lona no ekipamentu seluk tan no provizoriamente hela iha rezidénsia família nian ne’ebé besik.
“Inséndiu ne’e rezulta kuaze sasán iha uma laran la salva,” Francisco Viana informa.
Entretantu, APC Munisípiu Baukau enkamiña ona relatóriu no tuir planu vítima referida sei hetan apoia materiál rekuperasaun husi APC Nasionál.
Jornalista: Natalino Belo
Editór: Xisto Freitas da Piedade
