OEKUSI, 25 Jullu 2025 (TATOLI) – Autoridade Inspesaun no Fiskalizasaun ba Atividade Ekonómika, Sanitária no Alimentár Institutu Públiku (AIFAESA,I.P), apela ba operadór ekonómiku hanesan restorante sira iha Rejiaun Administrativa Espesiál Oekusi Ambeno (RAEOA) atu kumpre rekizitu hodi garante ijiene.
“Restaurante sira iha Oekusi ami seidauk halo inspesaun no simu keixa ruma, maibé mak ne’e ami husu nafatin maluk sira-ne’ebé loke karik, presiza kumpre nafatin rekezitu báziku sira hodi garantia nafatin ijiene, tanba ne’e bai ta hotu nia saúde,” Diretóra Operasionál AIFAESA, Claudina Soares Pinto, infroma, iha ámbitu desiminasaun papél AIFAESA nian ba operadór ekonómiku sira iha salaun administrasaun Numbei.
Nia esplika, rekizitu báziku ba restaurante atu kumpre nafatin mak ne’e, fatin tenki ketak-ketak hanesan, koziña, fatin serve ba han, toilet, armazen no seluktan. Uma ka fatin restaurante, didin-lolon, kakuluk, odamatan, janela, ventilasaun, pavimentu ka rai, tenki iha kondisaun di’ak no moos.
Nune’e mós drainazen ka bee-dalan sira tenke taka metin, fasilidade sanitária, toilet, wastafel, tenke iha, jestaun lixu (lixeira) tenki taka metin, ambiente kondisaun jerál tenke moos, ekipamentu fasilidade serve ba kliente sira tenki di’ak no moos, preparasaun ai-han, prosesu te’in tenke garantia kualidade no ijiene, armazenamentu tenke iha no ijiene, traballadór tenke iha kondisaun saúde ne’ebé di’ak, fomesementu bee, kontrola peste, konservasaun produtu ai-han kímiku.
Iha biban ne’e mós, parte AIFAESA fó hanoin ba indústria bee-moos, ne’ebé prodús bee-galon presiza garantia ijiene dokumentu ba lisensamentu nian, tanba bazea dekretu-lei númeru 5/2009, loron 15 fulan Janeiru, regula kona-ba lisensiamentu komersializasaun no kualidade ba bee-moos.
“Iha Oekusi ami rona seidauk iha empreza loke indústria bee-moos, maibé sira-ne’ebé halo bee-galon, ami husu, ita-bo’ot sira-nia dokumentu tenke iha no fatin tenke moos, tanba ekipa AIFAESA atu destaka ona iha Oekusi, ne’ebé atividade inspesaun sei la’o loron-loron inklui sábadu no dominngu,” nia apela.
Jornalista: Abílio Elo Nini
Editór: Rafael Ximenes de A. Belo
