BOBONARU, 25 Jullu 2025 (TATOLI)—Autoridade Munisipál Bobonaru preparadu simu vizita illas Krúz Joven internasionál mai husi nasaun Koreia.
Sekretáriu Autoridade Munisipál ba Asuntu Sosiál no Organizasaun, Júlio Carvallo Caeiro informa iha tempu badak sei forma komisaun hodi halo preparasaun ba eventu ne’e.
Caeiro haktuir katak Autoridade Munisipál Bobonaru simu responsablidade husi Igreja atu halo normalizasaun ba estrada, tesi ai iha parte dalan ninin, organiza komunidade sulan animál ne’ebé movimenta iha dalan públiku, prepara mós fatin toba kompletu ho saneamentu ba pregrinu sira husi munisípiu seluk.
“Atividade sira-ne’e ami sei hahú iha 10 Agustu ba leten, maibé estrada husi Bobonaru mai Maliana komesa normalizada ona. Agora, Balibó nia foin la’o. Ami espera katak bainhira atu to’o 20 Agustu ne’e estrada ne’e normalizada ona,” nia informa ba jornalista sira iha Salaun Maria-Tapó, Bononaru, Sesta ne’e.
Tuir oráriu, vizita Krúz Joven Internasionál estadia iha Kreda Timor durante semana ida hosi 23- 30 Agustu 2025. Iha 23 Agustu, simu Krúz Joven Internasionál iha Kreda Timor, Vijília Se Latedrál no espozisaun promosaun vokasionál. Iha 24 Agustu, misa hamutuk ho sarani sira iha Se Katedrál kontinua vijília iha kalan espozisaun promosaun vokasionál.
Iha loron 25 Agustu, Dioseze Maliana hala’o pregrinasaun hamutuk ho peregrinu Dioseze Baukau no Arkidioseze Dili, misa hamutuk ho sarani Dioseze Maliana iha Pro Katedrál Maliana, vigília husi sarani sira.
Iha loron 26 Agustu, pregrinasaun Krúz Joven Internasionál ba Parókia Bobonaru, misa abertura Jornada Nacional Juventude (JNJ). Iha loron 27 Agustu, palestra ho tema: “Ha’u Hamrook” no partilla Krúz Joven Internasionál husi Koreia Súl.
Iha 28 Agustu, asaun karidade ba sarani Parókia Bobonaru, palestra husi Ministru Juventude, Desportu, Arte no Kultura. Iha loron 29 Agustu, entrega Krúz Joven no pregrinasau hikas mai Dili.
Iha loron 30 Agustu, misa enserramentu Krúz Joven Internasionál iha Sé Katedrál no prosisaun ba aeroportu hodi ba Tailándia.
Jornalista: Sergio da Cruz
Editór: Xisto Freitas da Piedade
