CLN Baukau kontinua halo intervensaun ba folin foos ho presu razoavel ba komunidade
DILI, 25 Jullu 2025 (TATOLI)—Sentru Lojístika Nasionál (CLN-sigla portugeza) Armazein Rejionál Baukau kontinua halo intervensaun ba folin foos ho presu razoavel iha Munisípiu Baukau.
Xefe CLN Armazein Rejionál Baukau, Agostinho Piedade da Silva esplika mezmu provizoriamente seidauk halo pakotamentu ba foos maibé armazein referidu kontinua distribui foos ba komunidade iha área Baukau Vila hafoin simu pakotamentu husi nasionál.
“Intervensaun kuaze loron-loron de’it. Ita prepara ba komunidade iha Postu Baukau Vila inklui Vemasse,” Xefe CLN Armazein Rejionál Baukau hateten iha nia kna’ar fatin, Baukau, Sesta ne’e.
Armazein Baukau simu foos husi nasionál hamutuk saka 1.400 distribui iha merkadu Baukau, foos hirak-ne’e distribui tutan bá Munisípiu Vikeke bazeia ba pedidu husi autoridade lokál hanesan iha Suku Kraras, Vikeke Vila, Postu Administrativu Ossú no seluk tan.
Hafoin simu husi nasionál iha semana kotuk, foos ho marka CLN kilógrama 25 ne’ebé fa’an ho folin $12.50 ne’e distribuidu ba komunidade besik saka 800.
“Agora iha saka 400-resin mak sei eziste, purvolta 10 tonelada. Ida-ne’e asegura atu komunidade balun ne’ebé hakarak direta mai sosa iha-ne’e,” Agostinho haktuir.
Entretantu, CLN Armazein Rejionál Baukau foin lalais la halo prosesamentu hanesan baibain tanba mákina eletrisidade avaria. Dezde tinan 2023 armazein referida halo funsaun hodi halo intervensaun ba merkadu ho foos baratu to’o ohin loron.
Jornalista: Natalino Belo
Editór: Xisto Freitas da Piedade
