Embaixadór Uniaun Europeia despede Primeiru-Ministru
DILI, 25 Jullu 2025 (TATOLI)-Embaixadór Uniaun Europeia, Marc Fiedrich, despede Primeiru-Ministru (PM), Xanana Gusmão, tanba mandatu remata ona iha fulan ida-ne’e, hafoin hala’o misaun durante tinan tolu iha Timor-Leste.
“Ha’u mai iha-ne’e hasoru malu ho primeiru-ministru atu halo despedida tanba ha’u-nia mandatu hanesan reprezentante Uniaun Europeia iha Timor-Leste sei remata iha semana oin”, Marc Fiedrich hateten iha Palásiu Governu, ohin.
Durante serimónia despedida ne’e, Embaixadór relata ba Primeiru-Ministru kona-ba buat hotu ne’ebé nia halo durante asume knaar.
Iha oportunidade ne’e, nia konsege halo diskusaun polítika ho Xefe Governu kona-ba importánsia husi Programa Desentralizasaun no Podér Lokál iha Timor-Leste ho nia natureza atu fó liután autonomia ba munisipalidade sira.
“Ko’alia mós kona-ba diversifikasaun ekonómika, importánsia husi dezenvolvimentu setór agrikultura no ikus liu kona-ba adezaun Timor-Leste nian ba organizasaun rejionál Association of Southeast Asian Nation ne’ebé sei sai hanesan membru plenu iha fulan-Outubru tinan ne’e”, nia dehan.
Tuir nia, durante tinan tolu iha Timor-Leste observa katak nasaun iha hela faze dezenvolvimentu, maski hasoru difikuldade maibé sei sai di’akliu iha futuru. Relasaun entre Uniaun Europeia no Timor-Leste la’o kle’ur ona no kontinua metin iha futuru.
Jornalista: Arminda Fonseca
Editora: Maria Auxiliadora
