VIKEKE, 25 Jullu 2025 (TATOLI)—Institutu Nasionál Administrasaun Públika (INAP) kapasita pesoál apoia suku na’in-40 husi Postu Vikeke Vila ho objetivu atu hasa’e koñesimentu no kapasidade funsionáriu apoia suku sira hodi hadi’ak liután sira-nia prestasaun servisu.
“Durante ne’e ita halo tiha rekrutamentu pesoál apoia suku sira ba hala’o servisu, laiha formasaun ida ba sira,” Diretór Servisu Organizasaun Naun Governamentál Munisipál Vikeke, Cosme Sarmento informa ba jornalista sira iha Vikeke Vila, Sesta ne’e.
Aleinde ne’e, Xefe Gabinete Vise-Ministériu Administrsaun Estatál (MAE), Constantino Soares espera katak formasaun durante loron lima partisipante sira bele hetan esperiénsia foun ruma hodi hala’o atendimentu di’ak liubá públiku iha aldeia no suku ne’ebé hakna’ar-aan ba.
“Munisípiu balun hanesan Manatutu, Dili, Ataúru no Likisá estabelese ona Balkaun Úniku no la kle’ur tan Vikeke sei iha Balkaun Úniku hodi halo atendimentu ba públiku. Ne’e duni, ha’u husu ba partisipante sira atu aproveita oportunidade ida-ne’e hodi aumenta koñesimentu hodi fornese dadus tanba Balkaun Úniku ne’e estabelese hodi fasilita komunidade trata sertidaun moris, Bileti Identidade (BI), kartaun eleitorál no passaporte,” nia hato’o.
Iha fatin hanesan, Diretór INAP, Luís Amaral esplika formasaun ne’e atu aumenta koñesimentu, kapasidade no abilidade hodi muda atitude funsionáriu suku sira bele atende komunidade.
“Formasaun durante loron lima ne’e, agente administrasaun suku sira bele aprende kona-ba jestaun ba aan rasik, tempu no oinsá hakerek karta ofisiál no formál, jestaun arkivu inklui oinsá mantein koordenasaun no komunikasaun di’ak ho ita-nia komunidade,” nia subliña.
Entretantu, formasaun ne’e hala’o durante loron lima hahú husi 21-25 Jullu 2025, formandu mai husi suku sanulu (10) ne’ebé eziste iha Postu Vikeke Vila, totál hamutuk na’in-40.
Jornalista: Vitorino Lopez da Costa
Editór: Xisto Freitas da Piedade
