DILI, 25 Jullu 2025 (TATOLI)—Ekipa Nasionál Kabuverde seidauk kura sofrimentu kanek ne’ebé halo husi Angola, maibé obrigadu tenke kontra hikas Angola iha faze finál modalidade futeból ne’ebé sei realiza iha aban, 26 jullu 2025, iha Estádiu Munisipál Dili.
Kabuverde rekoñese Angola nu’udár ekipa forte iha modalidade desportu tanba iha faze kualifikasaun, elementu Jorge Conceição sofre derrota 2-0 husi Angola iha Jogu Desportivu Komunidade Nasaun Lian Portugés (CPLP-sigla portugeza) ba dala-XII 2025.
“Ami iha ona finál maibé Angola ekipa forte no sira iha jogadór ne’ebé kualidade di’ak,” Treinadór Ekipa Kabuverde, Jorge Conceição informa ba TATOLI hafoin ramata jogu kontra Portugál iha Estádiu Munisipál Dili, Kinta (24/07).
Maski nune’e, Jorge hateten, Kabuverde preparadu no iha misaun atu responde tátika husi Angola nune’e gaña vitória no sai kampiaun ba modalidade futeból iha Jogu Desportivu CPLP XII.
Kabuverde rasik hakat bá finál tanba hetan pontu neen iha tabela klasifikasaun hafoin hikis Portugál no Timor-Leste.
Enkuantu, Angola rasik durante Jogu Desportivu CPLP, gaña pontu hitu nune’e lidera tabela klasifikasaun hafoin manán Timor-Leste no Kabuverde no impata ho Portugál.
Jornalista: Natalino Belo
Editór: Xisto Freitas da Piedade
