DILI, 25 Jullu 2025 (TATOLI) – Jogu Komunidade Nasaun Ko’alia Lian Portugés (CPLP) Edisaun da-12, ne’ebé realiza tinan ne’e iha Timor-Leste nu’udar oportunidade importante atu hametin lasu amizade, kooperasaun no troka esperiénsia entre povu sira husi Estadu-membru.
Ministra Kultura, Juventude no Desportu husi Portugál, Margarida Ferreira, destaka importánsia eventu ne’e no haforsa relasaun entre nasaun sira CPLP.
“Sente kontente tebes ba realizasaun Jogu Desportivu CPLP, ne’ebé aprofunda relasaun entre país, aleinde língua, liuhusi lasu profundu amizade no istória komún”, nia hateten ba Tatoli bainhira asiste kompetisaun finál ba modalidade Karaté-do iha Jináziu Dili, ohin.
Nia salienta katak desportu iha papél fundamentál iha konstrusaun lasu ida sólidu no nu’udar oportunidade ida atu país membru sira bele hamutuk hodi kria kooperasaun iha área referidu iha futuru. Hodi salienta katak iha reuniaun Ministru Juventude Desportu CPLP sei toka mós asuntu koopresaun iha área desportiva.
Nune’e mós Ministru Saúde no Desportu husi Saun Tomé no Prísipe, Celso Matos, elojia organizasaun jogu entre nasaun partisipante.
“Saun Tomé no Prínsipe kontente partisipa iha eventu hotu. Amizade ho nasaun seluk CPLP, no ita labele falta. Timor-Leste serbisu barak ba iha organizasaun ne’e, ita mós apoiu no labele falta”, ministru ne’e hateten ba Tatoli, iha Jináziu Dili, ohin.
Ba ministru Celso, Jogu CPLP ne’e nakonu ho amizade entre povu nasaun membru, partilla esperiénsia no espíritu kompetisaun. “Ho amizade, vensedór sira ita parabeniza. Maibé, mai iha ne’e konfraternizasaun entre povu CPLP”, nia hateten.
“Ita hanoin katak sei kontinua ajenda ne’e ho di’ak liután, no ita hakarak eventu ne’e ba futuru iha joven barak mak kompete”, nia espera.
Jornalista: Nelson de Sousa
Editora: Maria Auxiliadora
