BOBONARU, 25 Jullu 2025 (TATOLI)—Autoridade Munisipál Bobonaru (AMB) submete ona proposta adisionál ba Ministériu Finansa atu aprova iha Orsamentu Jerál Estadu (OJE) 2026 nune’e bele finaliza implementasaun Programa Nasionál Dezenvolvimentu Suku (PNDS) tinan 2024 nian.
Sekretáriu Autoridade Munisipál Bobonaru ba Asuntu Planeamentu no Dezenvolvimentu Integradu, Semedo Laco informa katak implementasaun PNDS tinan kotuk iha programa hamutuk 13 mak la konsege finalizadu tanba orsamentu fila ona bá kofre Estadu.
“Agora ita halo levantamentu ladi’ak tanba nia regra mak hanesan ne’e ona. Tan ne’e mak autoridade hanoin tau fali iha orsamentu 2026. Montante ha’u la lembra maibé ita propoin para ita bele kontinua filafali obra 2023-2024 ne’ebé seidauk finalizada ne’e,” nia informa ba jornalista sira iha Salaun Maria-Tapó, Bobonaru, Sesta ne’e.
Semedo informa katak Autoridade Munisipál Bobonaru sei ba defende proposta adisionál ne’e iha Komisaun Revizaun Orsamentál (KRO) tanba obra hirak-ne’e fízikamente balun atinje ona 70% no 80% liu.
Programa 13 ho tipu kontrusaun estrada rurál no seluk tan, maibé barak liu konstrusaun eskola hanesan iha Suku Ritabu, Postu Administrativu Maliana, Suku Oe-leu, Suku Leber no Suku Tebabui, Postu Administrativu Bobonaru. Projetu carry over hirak-ne’e barak liu iha Postu Administrativu Lolotoe no Bobonaru.
Enkuantu, iha tinan 2025 ne’e, Servisu Munisipál Apoiu PNDS hetan alokasaun orsamentu hamutuk $1.817.733. Husi montante ne’e, $1.635.597 aloka bá infraestrutura no $181.733 aloka bá operasionál no finansia projetu 50 ne’ebé klasifika ba setór sira hanesan dalan, ponte no kontrolu seias hamutuk 35, setór bee-moos, saúde no setór edukasaun.
Jornalista: Sergio da Cruz
Editór: Xisto Freitas da Piedade
