KOVALIMA ,25 Jullu 2025 (TATOLI)- Prezidente Autoridade Munisípiu Kovalima, Miguel Armada Cardoso, sesta ne’e, realiza atividade diálogu hodi partilla atividade programa Governu ba komunidade iha postu Suai,Munisípiu Kovalima.
Atividade diálogu ne’e ho nia Tema Hakbesik-an ba komunidade hodi rona entidade hotu atu tau iha planu dezenvolvimentu Munisipál.
“Hakbesik ba komunidade hodi rona entidade hotu nia hanoin atu tau iha planu dezenvolvimentu Munisipál. Ha’u hato’o agradese ba komunidade bele rona Iha programa governu”, PAM Kovalima Miguel Armanda Cardoso hato’o iha nia diskursu bainhira hala’o diálogu ho komunidade iha aldeia Haemanu,Suku Beco, ohin.
Autoridade Kovalima nia prezenta iha suku Beco, ho objetivu kria lazu amizade ida entre Autoridade Munisipál hodi hakbesik-aan ho Komunidade hodi sosializa programa prioridade sira.
Fortifika lei tara bandu ne’ebé iha ona matéria ezbosu ida, hodi hakat ba aprezentasaun iha Konsellu Konsultivu Munisipál atu iha kbi’it hodi bele iha desizaun.
Pontu prinsipál ne’ebé partilla mak prepara kondisaun hodi simu desentralizasaun ne’ebe sei akontese iha tempu badak, kria kondisaun ba komunidade liuhusi Infraestrutura báziku hanesan estrada, ponte ho seluk seluk tan, iha parte agrikultura hanesan prepara rekursu umanu,kria kondisaun husi tradisionál ba iha semi modernu, planu ka prepara demanda merkadu, Identifika no planu buka reseita rasik liuhusi Turizmu.
Presiza prepara an simu desentralizasaun administrativu no podér lokál
PAM Kovalima dehan, atu simu dezentralizasaun presiza rekursu inteletuál, rai kovalima rai ne’ebé bokur oinsá atu d’iak fila sai nu’udar autor ba pensamentu no desizaun atu simu desentralizasaun.
Iha fatin hanesan, Administradór Postu Administrativu Suai,Idelfonso Maria Amaral, reforsa autoridade Kovalima hala’o atividade ho hanoin foun husi prezidente autoridade munisípiu Kovalima.
“Ita rona barak husi PAM tanba hau Autoridade postu fó hanoin ba nia komunidade presiza no hato’o hanoin bele kritiku, maibé tenke iha vizaun no misaun,” nia affirma.
Entretantu, Inteletuá husi Beco, Luzinho do Rego hato’o agradese ba Prezidente Autoridade tanba bele hakbesik ba komunidade hodi partilla planu no programa Munisipál ba komunidade sira.
“Ha’u hato’o agradese ba autoridade Kovalima tanba bele partilla planu no programa ba komunidade sira iha suku Beco”, nia agradese.
Jornalista : Celestina Teles
Editór:Florencio Miranda Ximenes
