DILI, 24 Jullu 2025 (TATOLI)–Angola liki Lafaek (Timor-Leste) to’o dolar. Rezulta Lafaek tenke lakon kbiit atu dolar bá-oin konkista nia objetivu (faze finál).
Tenke simu realidade. Ekipa Selesaun Nasionál Futeból Timor-Leste sofre golu 1-3 hafoin derrota ho ekipa Angola iha kompetisaun modalidade futeból iha Jogu Desportivu Komunidade Nasaun Lian Portugés (CPLP-sigla portugeza) ba dala-XII 2025, ne’ebé hala’o iha Estádiu Munisipál Dili, Kinta kalan ne’e.
Iha jogu primeira parte minutu sanulu, ekipa Angola ne’ebé hahú inísia atake no kontinua kontrola jogu nune’e kada jogadór halo pasajen bola husi klaran bá ninin karuk no loos nune’e rezulta golu 0-2. Golu dahuluk enxe husi jogadór Pedro António (15) iha minutu haat no golu daruak enxe husi Santos (14) iha minutu ualu.
Angola ne’ebé sei hasoru Kabuverde iha finál, kontinua domima kampu iha-ne’ebé ekipa Lafaek difísil atu halo balansu tanba angolanu sira hamate bola ka halo pasajen bola rai no asaun individuál ne’ebé atrativu.
Ekipa Lafaek mezmu hetan apoia maioria iha tribun maibé elementu treinadór Kim ne’e, joga laiha espiritu. Durante primeira volta, estatístikamente guarda rede Angola, Adilson la halo salvasaun ruma tanba laiha ameasa ba guarda rede.
Maibé, hela minutu rua antes jogu parte dahuluk ramata, ekipa Timor-Leste, liuhosi kontra-atake, jogadór Reinaldo (7) hamoris esperansa. Esperansa sai tebes esperansa. Nia enxe kedas golu hodi muda tabela skor ba 1-2 bainhira simu bola husi Geremias Barreto (19) husi kampu klaran.
Iha jogu parte daruak, ekipa Angola halo mudansa jogu. Iha inísiu antes árbitu lian, jogadór Paulo António (4), Luvumbo (9) no Domingos (10) tama hodi substitui Augusto (13), Morais (2) no Pires (11) nune’e hasa’e liután rítmu jogu hodi rezulta tabela skor sai 1-3 iha minitu 47 bainhira jogadór Luvumbo (9) enxe golu hafoin simu pasajen kruza husi Francisco (18).
Ekipa Timor-Leste iha minutu 58 halo mudansa liuhosi substituisaun jogadór Gilson (14) tama no Vong (11) sai. Mezmu nune’e, angolanu sira la fó espasu atu Timor-Leste hamihis skor to’o guarda rede husi Angola tenke hakat ain sai husi kampu tanba substitui husi Gelson (12).
Ekipa rua maski nafatin hala’o jogu maibé árbitu Dori Santos tenke hapara jogu bainhira oras hatudu 80+2 sinál Angola gaña vitória no tenke hakat bá faze finál kontra Kabuverde iha modalidade futeból Jogu Desportivu Komunidade Nasaun Lian Portugés (CPLP-sigla portugeza) ne’ebé sei realiza iha Sábadu, 26 Jullu 2025.
Enkuantu, Timor-Leste sei kontra Portugál hodi hadau terseiru lugár iha jogu ne’ebé sei realiza iha aban, Sesta (25 jullu), iha Estádiu Munisipál Dili.
Entretantu, modalidade futeból iha faze kualifikasaun Angola gaña pontu 7, rezultadu husi manán 2 no empata 1, tuir kedas Kabuverde pontu 6 (manán 2, derrota 1), Portugál pontu 4 (manán 1, empata 1 no derrota 1) no Timor-Leste pontu 0, rezultadu husi derrota 3.
Jornalista: Natalino Belo
Editór: Xisto Freitas da Piedade
