DILI, 25 Jullu 2025 (TATOLI) – Timor-Leste mak uma-na’in ba Jogu Desportivu Komunidade País Ko’alia Lian Portugés (CPLP) ba Edisaun da-XII, ne’ebé hala’o durante loron 17 to’o 27 Jullu ne’ebé mai ho lema “Unidu Ita Ida De’it”.
Eventu internasionál ida-ne’e reúne atleta atus ba atus husi nasaun-membru CPLP, inklui Angola, Kabuverde, Mosambike, Saun Tomé no Prínsipe no Portugál. Maski Brazíl, Giné-Bisau no Giné Ekuatoriál la partisipa iha edisaun ne’e, kompetisaun konta ho modalidade ualu: futeból, tenis kampu, voleiból praia, karaté-do, taekwondo, xadres, basketeból no atletizmu.
Iha ne’e, TATOLI aprezenta kona-ba atleta sira-nia haree no sentimentu sobre realizasaun Jogu CPLP iha Dili.
Atu koñese persesaun no esperiénsia husi partisipante sira, TATOLI rona atleta husi delegasaun oioin, ho destake ba jogadór sira husi modalidade voleiból praia, ne’ebé espresa sira-nia satisfasaun ba organizasaun no ospitalidade timoroan sira-nia iha Jogu Desportivu CPLP ne’e.
“Ami sente hela iha ami-nia uma rasik”
Tito Oliveira, atleta husi Portugál, manifesta nia hanoin kona-ba Jogu CPLP katak realizasaun eventu ne’e iha Timor-Leste furak tebes.
“Maski ami mai husi nasaun diferente, maibé to’o Timor-Leste, hahú tun iha aeroportu, ami sente kontente, tanba Timor-Leste hanesan uma-na’in ba jogu ne’e simu ami ho di’ak. Durante ami hela iha otél la falta buat ida. Ami han, hemu no transporte ba ami Governu prepara. Ami sente ami hela iha mai-nia uma rasik”, Tito Oliveira dehan hafoin jogu finál voleiból praia, iha Lesidere, Dili.
Hanoin hanesan mós hato’o husi atleta portugés Luís Filipe katak sente kontente tanba durante jogu voleiból praia ne’e lao di’ak tebes, organizadu no laiha problema.
“Adeptu sira no komunidade Timor-Leste fó benvidu tebes ba jogadór husi nasaun CPLP”
Arnoldo Nhantumbo, husi Mosambike, hateten, Jogu CPLP ne’ebé realiza iha Timor-Leste ne’e di’ak tebes, liuliu ba kampu voleiból praia rasik iha ambiente furak no tulun jogadór sira joga ho di’ak.
Aleinde ne’e, múzika ne’ebé animada tebes durante goju, inklui adeptu sira no komunidade Timor-Leste fó benvidu tebes ba jogadór sira husi nasaun CPLP sira.
“Oportunidade atu hasoru atleta sira husi nasaun seluk, la fásil maibé iha jogu ne’e la espera, bele koñese malu no bele halo belun ne’ebé barak no bele aprende esperiénsia husi nasaun seluk”, dehan.
Durante iha Timór, nia halo belun barak ho timroan, kabuverdianu, portugés, saun-tomense, tanba ko’alia lian ida de’it, mak língua portugeza.
“Ami haree Timor-Leste nu’udar nasaun ne’ebé dezenvolvida, pás, laiha konflitu”
Iha sorin seluk angolanu Ruben Campos hateten nia partisipasaun iha Jogu CPLP iha Timor-Leste, tanba bele mai haree Timor-Leste nia natureza no kultura ne’ebé furak.
Maski iha jogu voleiból praia ne’e rasik sira elimina antes, maibé ida-ne’e hanesan esperiénsia ida ba sira atu hadi’a iha futuru.
“Organizasaun CPLP di’ak tebes, bele fó oportunidade ba foinsa’e sira partisipa iha jogu ne’e. Durante iha Timór ami la kuran buat ida. Governu Timor-Leste simu ami di’ak, ami haree Timor-Leste nu’udar nasaun ne’ebé dezenvolvida, pás, laiha konflitu”, nia realsa.
“Mai foufoun hanoin konsidera ami ne’e estranjeiru, maibé la’e. Ami konfortavel tebes”
Atleta husi Saun Tomé no Prínsipe, Osmar Tomer, mós orgullu tebes ba komisaun organizadora ba eventu Jogu Desportivu CLPL ne’e, tanba halo sira-nia prezensa iha Timór sente hela iha sira-nia rai.
“Ami mai foufoun, hanoin Timor-Leste konsidera ami ne’e estranjeiru, maibé la’e. Ami sempre hetan atendimentu ne’ebé di’ak. Ami konfortavel tebes tanba sente iha ami-nia uma. Tanba iha ne’e ema barak ko’alia lia-portugés, entaun familiar tebes ho ami”, nia salienta.
Tuir nia, Jogu Depostivu CPLP ne’e di’ak no la’ós foku de’it mak polítika nasaun nian, maibé oinsá mós fó oportunidade ba joven sira ne’ebé iha talentu.
“Kultura Timor-Leste nian diferente tebes ho ami, hahú husi hatais no asesoris sira. Ida-ne’e halo úniku tebes Timor-Leste nia presenza iha organizasaun ida-ne’e. Ami gosta tebes natureza Timor-Leste maski manas”, nia espresa.
“Oportunidade bele hatene malu, liuliu Timor-Leste nia kultura ne’ebé furak”
Atleta kabuverdiana, Catarina Fonseca, manifesta hanoin katak organizasaun Jogu CLPL iha Timor-Leste di’ak tebes. “Ami gosta tebes kampu voleiból praia Timor-Leste tanba sempre iha múzika animasaun durante jogu”.
Nia parte kontente tebes tanba bele koñese malu ho belun sira husi nasaun sira seluk. “Maski ami ko’alia lian ida de’it, maibé difísil atu koñese malu, entaun oportunidade liuhusi organizasaun ne’e ami bele hatene malu, liuliu Timor-Leste nia kultura ne’ebé furak tebes”, dehan.
Ikus, Tatoli mós rona hanoin balun husi atleta timoroan rasik, Noeh Deo Gracias, katak nia orgullu tebes ba org anizasaun Jogu CPLP tinan ne’e iha Timor-Leste.
“Husi jogu ne’e ami bele koñese di’ak liután atleta sira husi nasaun sira seluk. Ami bele manán esperiénsia barak husi atleta sira husi nasaun barak, maske jogu ne’e ami timoraon hetan osan-mean ladún barak. Maibé ho esperiénsia ne’ebé ami hetan sai hanesan bukae ida hodi kompete iha oportunidade seluk”, konklui.
Jornalista: Arminda Fonseca
Editora: Maria Auxiliadora
