DILI, 25 Jullu 2025 (TATOLI)— Kontinjente portugés hetan rezultadu brillante ba xadrez iha Jogu CPLP XII 2025 ne’ebé hala’o iha Dili, Timor-Leste. Portugal manán hotu medalla osan-mean/ouru neen iha kategoria tolu mak hanesan klásiku, rápidu, no blitz mistu.
Portugál nia vitória barak liu tanba dezempeñu impresionante hosi jogadór xadrez joven Matviy Faryma (2009), ne’ebé kompete iha kategoria tolu hotu hamutuk ho nia parseira, Sofia Moreira Lopes Rosas Valente (2010).
Faryma hetan klasifikasaun internasionál aas liu iha torneiu ida-ne’e, ho Rapid 2341, Standard 2230, no Blitz 2181. Entretantu, nia omólogu feto, Sofia, hetan klasifikasaun Standard 1959 no Blitz 1902.
“Ida ne’e ba dala tolu ona. Ha’u kontente tebes, no ne’e sira hanesan adversáriu no jogadór forte ho esperiénsia barak iha xadrez. Ha’u hakfodak iha jogu rua dahuluk; la’ós fásil hanesan ne’e. Sira adversáriu ne’ebé forte tebes duni,” Matviy Faryma hateten hafoin simu nia medalla osan-mean.
Aleinde fó komentáriu kona-ba jogu ne’e, Faryma mós espresa nia admirasaun ba nasaun uma-na’in.“Rai ida ne’e furak teb-tebes, kultura ne’e estraordináriu. Ha’u kontente tebes mai iha ne’e.Obrigado,” nia hateten.
Iha eventu ne’e, nasaun sira hanesan Angola maka sai hanesan konkorente sira ne’ebé maka’as liu, hodi manán medalla osan-mutin (prata) neen, enkuantu Kabuverde lori ba uma medalla osan-metan ka bronze lima. Entretantu, Timor-Leste nu’udar uma-na’in kontribui mós ho medalla bronze tolu, ida iha kategoria Rápidu Mane no rua iha kategoria Blitz Mistu.
Ekipa Timor-Leste hetan apoiu husi atleta joven sira hanesan Rivanho Viegas (2009), ho Standard rating 1655 no Blitz 1691, no Lizete de Sousa (2011). Iha kategoria rápidu, Timor-Leste reprezenta husi Noelio Garcia Menezes (2014) no Amelia Aleixo da Costa (2009).
Lista atleta husi nasaun seluk ne’ebé partisipa iha torneiu ne’e inklui :
- Angola : Célio A. D. Tchilulo no Daniela de F. S. da Cruz
- Kabuverde: Celton M. S. Ramos no Akiane P. B. Moreno
- Mosambike: Denilson F. Simbine no Ayrine C. Ismael
- São Tomé e Príncipe: Daniel da C. F. Ramos no Emelissa M. do Ó de Moura.
Torneiu xadrez CPLP XII hala’o husi loron 21 to’o 25 fulan Jullu tinan 2025, iha Sentru Konvensaun Dili (CCD). Jogu hotu hetan supervizaun husi árbitru nasionál na’in sia husi Timor-Leste no árbitru internasionál na’in haat husi Portugál, São Tomé e Prínsipe, no Cabo Verde.
Hafoin jogu sira, atleta vensedór sira simu sira nia medalla hosi reprezentante governu Timor-Leste, delegadu hosi nasaun CPLP, no reprezentante hosi FIDE (Federasaun Xadrez Internasionál).
Xadrez hanesan desportu ida ne’ebé kompetitivu liu iha Jogu Desportivu CPLP XII 2025. Aleinde sai hanesan plataforma ida hodi hatudu abilidade, torneiu ne’e sai mós hanesan símbolu ida hosi amizade no troka kulturál entre nasaun sira ne’ebé ko’alia lian portugés.
Jornalista : Cidalia Fátima
Editora : Armandina Moniz
