MANUFAHI, 26 Jullu 2025 (TATOLI)-Prezidente Bee Timor-Leste, Empreza Públika (BTL, E.P), Gustavo da Cruz, informa BTL E.P planea harii balkaun ida iha postu Fatuberliu, Manufahi hodi jere sistema instalasaun bee-moos nian ne’ebé mak Governu foin inaugura.
Dirijente BTL, E.P hateten, agora daudaun ne’e sira foin mak halo inaugurasaun ba fornesimentu bee-moos iha komunidade-759, nune’e sira presiza destaka tékniku ruma hodi jere sistema instalasaun bee nian.
“Ami sei estabelese balkaun ida, sei tau tékniku operadór na’in-rua, tékniku kliente ida, hodi halo servisu loro-loron, akompaña sistema instalasaun bee-moos nian”, dehan nia ba jornalista sira iha serimónia inaugurasaun bee-moos iha Fatuberliu, Manufahi, ohin.
Nia hateten, sistema ne’ebé Governu fornese ba komunidade durante oras-24, katak bainhira loke xave distribuisaun bee nian, maka bee sei sai hotu kedas ba iha ida-idak nia uma, tanba ne’e mak ita presiza destaka pesoál tékniku sira iha ne’e hodi jere didi’ak sistema, sela’e bele aat lalais.
“Ekipa sira-ne’ebé sei destaka, balun halo servisu tékniku nian no seluk halo relatóriu atu komunidade sira bele selu tuir kontadór, aleinde ne’e sira bele kontrola torneira sira-ne’e atu komunidade uza ho di’ak no labele hetan estraga husi animál ka ema rasik”, nia informa.
Daudaun ne’e ekipa BTL, E.P halo hela koordenasaun ho autoridade lokál sira iha Fatuberliu hodi buka rai ba estabelesimentu balkaun BTL nian.
Notísia relevante: BTL, E.P aprezenta ona rezultadu estudu viabilidade dada bee husi Railaku ba KAFI
Jornalista : Alexandra da Costa
Editora : Rita Almeida
