Governu sei komunika ho empregadór Austrália halo rekrutamentu ba traballadór foun

DILI, 20 Outobru 2025 (TATOLI)—Governu liuhusi Sekretária Estadu Formasaun Profisionál no Empregu (SEFOPE) kontinua esforsu halo komunikasun ho empregadór foun sira iha Austrália hodi fó biban halo rekrutamentu ba kandidatu traballadór foun sira-ne’ebé naran tama ona sistema maibé seidauk hetan oportunidade ba servisu.

Diretór Jerál SEFOPE, Carlito Rosário Cabral, rekoñese kandidatu barak mak naran tama ona sistema maibé seidauk hetan kontaktu husi empreza sira hodi ba servisu no Governu sei buka meiu.

“Prosesu nafatin la’o timoroan balun laiha oportunidade ne’e, tamba dalabarak kompañia halo rekrutamentu fali ba traballadór tuan sira no kanidatu foun ne’e foti uitoan de’it, liuliu Australia nian,” Diretór ne’e hateten ba Tatoli iha edifisiu SEFOPE, Kaikoli, segunda ne’e.

Nia dehan, meiu ne’ebé SEFOPE halo hela mak mantein komunikasaun ho empregadór foun sira iha Austrália ne’ebé seidauk rekruta timoroan ba servisu iha sira-nia empreza.

“Ami mantein nafatin dadus ka dokumentu husi kandidatu sira-ne’ebé naran tama ona Sistema, atu nune’e bainhira empregadór balun presiza traballadór timoroan ita sei fasilita sira tuir teste,” nia dehan.

Entretantu empregadór husi Austrália ne’ebé daudaun ne’e halo akordu ho Timor-Leste liuhusi SEFOPE hamutuk 132.

Jornalista : Alexandra da Costa

Editór       : Cancio Ximenes