MAPPF sosa ona tratór 23 atu distribui ba agrikultór sira
DILI, 05 Novembru 2026 (TATOLI) – Diresaun Nasionál Agrikultura, Ortikultura no Protesaun (DNAOP), Ministériu Agrikultura, Pekuária, Peska no Floresta (MAPPF), sosa ona tratór hamutuk unidade 23 atu distribui ba agrikultór sira.
Diretór Nasionál Agrikultura, Ortikultura no Protesaun, Lúcio Nuno, hatete daudaun Governu kontinua hadi’a irrigasaun, tanba ne’e presiza mós tratór nune’e apoia agrikultór sira atu hasa’e produsaun.
“Tinan ne’e ita sosa tan tratór boot fila-rai hamutuk 23 ho totál orsamentu $978.731. Tratór sira ne’e agora iha ona ministériu, fulan ne’e nia rohan sei distribui”, Lúcio Nuno hatete ba Tatoli, ohin.
Tuir nia, importante tebes sosa tratór sira ne’e tanba Governu iha planu atu hasa’e produsaun rai-laran, entaun ekipamentu sira-ne’e hanesan meiu ida atu ajuda agrikultór sira.
Tratór ne’ebé daudaun utiliza hela hamutuk 267, kompostu husi tratór médiu 200 no hand tratór 67, no tratór sira ne’ebé kondisaun ladi’ak ona no tama ba leilaun hamutuk 56.
“Tratór sira ne’ebé sei di’ak ne’e ita mós kada tinan prevee osan hamutuk rihun $300, para balun avaria karik atu sosa ninia ekipamentu (spare part), nune’e halo manutensaun”, nia dehan.
Notisía relevante: https://tatoli.tl/2025/08/15/mappf-sosa-tan-trator-22-hodi-tulun-agrikultor-hasae-produsaun-hare/
Jornalista: Arminda Fonseca
Editora: Maria Auxiliadora
