Telkomcel kuda ai-parapa 1.500 hodi reforsa kompromisu ESG
DILI, 06 Novembru 2026 (TATOLI – Empreza telekomunikasaun Telkomcel hola parte iha atividade Asaun Verde – Green Action for Sustainability, hodi kuda ai-parapa hun 1.500 iha Dolok Oan, Kristu Rei, Dili. Atividade ne’e hatudu kompromisu empreza nian ba sustentabilidade ambiente no reforsa prátika ESG (Environmental, Social, and Governance) hodi hakbiit komunidade.
Ho tema “We Connect People through Technology, Today We Connect Communities to Nature”, atividade ne’e haktuir katak konektividade la’ós de’it limite ba teknolojia no komunikasaun, maibé inklui mós esforsu atu liga ema, komunidade, no meiu ambiente iha kria futuru ne’ebé sustentavel liu.
Ba Telkomcel, atividade ne’e parte husi kompromisu kompañia nian atu hato’o kontribuisaun ne’ebé luan liu, la’ós de’it liuhusi dezenvolvimentu negósiu no teknolojia de’it, maibé mós liuhusi inisiativa oioin ne’ebé fó impaktu pozitivu ba komunidade no meiu ambiente.
Chief Commercial Officer (CCO) Telin, Kharisma, hatete katak kbiit teknolojia nian tenke la’o hamutuk ho atensaun ba meiu ambiente. Tuir nia, konektividade iha ho signifikadu ne’ebé luan liu, maka harii relasaun ne’ebé hamutuk hametin entre ema, komunidade, no meiu ambiente.
“Kuda ai-parapa 1.500 ne’e atividade reflorestaun ida no ita-nia kompromisu hamutuk atu kuída ekosistema tasi-ibun, hametin kbiit komunidade nian, no proteje futuru ba jerasaun sira ne’ebé atu mai. Ba ami, konektividade la’ós de’it kona-ba liga ema liuhusi teknolojia, maibé mós kona-ba liga komunidade ho meiu ambiente no dudu asaun loloos ba futuru ne’ebé sustentável liu”, Kharisma realsa.
Tuir nia, ai-parapa importante atu mantein ekilíbriu ekosistema kosteira sira husi erozaun, sustenta biodiversidade, nomós apoia moris komunidade kosteira nian.
Liuhusi atividade ne’e, Telkomcel ho mehi bele fó kontribuisaun iha konservasaun ambiente, inklui hasa’e koñesimentu no partisipasaun komunidade nian iha kuída no proteje rikusoin naturál Timor-Leste nian.
Kompromisu tolu ba futuru ne’ebé sustentavel
Liuhusi Asaun Verde, Telkomcel hametin kompromisu prinsipál tolu ne’ebé sai nu’udar baze atu harii futuru ida ne’ebé di’ak liu ba ema hotu. Ida, Tomorrows People AreInspired fó inspirasaun ba jerasaun foinsa’e sira liuhusi asaun loloos no dudu atensaun ba meiu ambiente nu’udar parte husi moris loron-loron nian.
Rua, Tomorrows PlanetIs Protected katak proteje rai ka planeta liuhusi preservasaun ekosistema tasi-ibun no esforsu kuída meiu ambiente ba jerasaun futuru sira, no tolu, Tomorrows Communities Are Empowered katak fó kbiit ba komunidade atu ativu liután iha partisipa kuída no prezerva meiu ambiente.
Telkomcel agradese no apresia ba reprezentante Governu hotu, parseiru, komunidade, estudante, no parte hothotu ne’ebé fó ona apoiu no partisipa iha susesu atividade Asaun Verde – Green Action for Sustainability ne’e.
Ai-parapa sira ne’ebé kuda iha Dolok Oan nu’udar mehi investimentu ba prezervasaun meiu ambiente, kbiit komunidade tasi-ibun nian, nomós futuru jerasaun sira ne’ebé atu mai.
Sekretáriu Estadu Floresta, Fernandinho Vieira da Costa, hato’o nia apresiasaun ba kontribuisaun Telkomcel nian iha apoia ba protesaun meiu ambiente iha Timor-Leste.
“Esforsu kuda ai-parapa 1.500 ne’e nu’udar pasu pozitivu ida iha apoia protesaun ekosistema tasi-ibun no hasa’e koñesimentu komunidade nian kona-ba importánsia kuída meiu ambiente”, nia dehan.
Nia hein katak ho kolaborasaun entre Governu, setór privadu, no komunidade bele kontinua hamutuk halo protesaun meiu ambiente no fó benefísiu ba prazu naruk ba Timor-Leste no jerasaun sira iha futuru.
Atividade kuda ai-parapa ne’e hala’o iha loron 30 Outubru 2026 ne’ebé partisipa direta husi Sekretáriu Estadu Floresta, Fernandinho Vieira, inklui komunidade, estudante, no parseiru, seluk tan.
Jornalista: Arminda Fonseca
Editora: Maria Auxiliadora
