Governu sobu rotunda Elemloi tanba espasu kloot hamosu engarafamentu
DILI, 06 Outubru 2026 (TATOLI)—Governu liuhusi Ministériu Obra Públika (MOP) sobu ona rotunda Elemloi ne’ebé lokaliza iha Delta no planea atu konstrui fali rotunda ne’e ho dimensaun boot atu fó espasu ba sirkulasaun movimentu transporte.
Notísia Relevante: Uma 30-resin afetadu ba projetu alargamentu estrada Elemloi–Ponte Comoro III
Xefe Gabinete Ministériu Obra Públika, Cristovão Fausto Guterres, informa Governu sobu rotunda Elemloi tanba kestaun espasu ne’ebé kloot hamosu engarafamentu.
“Ita la’ós sobu de’it maibé oinsá atu rezolve engarafamentu iha área refere. Espasu iha rotunda kloot, dalaruma viatura boot sira labele sirkula ho di’ak entaun sempre hammosu engarafamentu,” Xefe Gabinete Ministériu Obra Públika, Cristovão Fausto Guterres, hateten ba Agência Tatoli lihhusi telefónika, ohin.
Nia hatutan, Ministériu iha planu rua mak hanesan planu ida mak konstrui fali rotunda no ida seluk mak estabelese semáforu modernu iha área refere atu hamenus engarafamentu no halo luan tan espasu Estrada referida.
“Entre opsaun rua ne’e dalaruma bele iha mudansa, depende ba simulasaun iha terrenu no ekipa tékniku sira mak hatene klaru liután,” nia esplika.
Nia hatutan, bainhira konstrui rotunda normalmente sei labele estabelese semáforu modernu, enkuantu estabele fali semáforu modernu entaun rotunda labele konstrui.
Jornalista : Alexandra da Costa
Editór : Cancio Ximenes
