Uma 30-resin afetadu ba projetu alargamentu estrada Elemloi–Ponte Comoro III
DÍLI, 08 Setembru 2026 (TATOLI) – Na’in husi uma 30-resin iha Suku Comoro, Postu Administrativu Dom Aleixo, Munisípiu Díli, simu ona notifikasaun atu hamamuk fatin ba projetu alargamentu estrada diresaun rotunda Elemloi to’o Ponte Comoro III.
Governu liuhusi Sekretaria Estadu Asuntu Toponímia no Organizasaun Urbana (SEATOU) aviza ona ba familia afetada sira atu prepara-an antes implementasaun projetu ne’e.
“Komunidade sira-nia uma hamutuk 30-resin mak sei hetan impaktu husi projetu ne’e. Sira simu ona notifikasaun husi Governu no kompleta ona dokumentu sira, hanesan kartaun eleitoral, konta bankária no termu aseitasaun. Dokumentu hirak ne’e submete ona ba Ministériu Obras Públikas (MOP),” Xefe Suku Comoro, Elígio José da Silva Marçal ba TATOLI, ohin.
Nia husu atu prosesu pagamentu ba família afetada sira bele lao lalais, bainhira sira kompleta ona dokumentu sira ne’ebé presiza.
Tuir Elígio, Governu fó períodu loron 90, hahú husi 01 Agostu to’o 01 Outubru 2026, ba família afetada sira atu prepara-an no sobu sira nia uma rasik antes hakat ba implementasaun projetu ne’e.
Nia konsidera alargamentu estrada ne’e importante atu hadi’a movimentasaun transporte no mellora ordenamentu kapitál Díli.
Maibé, Elígio husu Governu atu implementa projetu ne’e ho transparansia no tuir prosedimentu legál ne’ebé vigora, liuliu iha prosesu kompensasaun ba família afetada sira.
“Lori komunidade nia naran, ami lakontra dezenvolvimentu. Maibé, ami husu atu iha komunikasaun di’ak entre Governu no komunidade atu ema hotu komprende prosesu ne’ebé lao hela,” nia dehan.
Elígio hatutan katak maioria família afetada depende ba negósiu ki’ik no atividade ekonomia informál atu sustenta sira nia moris loroloron.
Tanba ne’e, nia husu Governu atu konsidera impaktu sosial no ekonomiku ne’ebé bele afeta família sira durante no depois implementasaun projetu.
Elígio dehan autoridade Suku Comoro kontinua halo koordenasaun ho ekipa téknika husi SEATOU no MOP atu fó informasaun klaru no atualizadu ba komunidade afetada sira.
Reprezentante komunidade afetada, Gil da Costa, mos hateten katak maioria rezidente sira uza sira nia propriedade ba atividade komersiál.
“Maioria ami halo negósiu ki’ik, hanesan fa’an hahán iha dalan ninin, loke restaurante, loja no ofisina motor. Ami prontu atu sai husi fatin ne’e atu apoiu projetu alargamentu estrada ne’e, maibé Governu tenke fó indemnizasaun ba uma no fatin negósiu sira ne’ebé sei sobu, tanba patrimóniu hirak ne’e harii ho ami-nia osan rasik,” Gil dehan.
Nia subliña katak komunidade la rejeita dezenvolvimentu, maibé hakarak mekanizmu kompensasaun no indemnizasaun ida-ne’ebé klaru no lalais atu evita preokupasaun no inserteza entre família afetada sira.
Projetu alargamentu estrada husi Rotunda Elemloi to’o Ponte Comoro III ne’e parte ida husi esforsu Governu atu hadi’a infraestrutura rodoviária iha Munisípiu Dili.
Projetu ne’e ho objetivu atu reduz engarafamentu tráfiku, no hamenus kresimentu desordanamentu iha sidade kapitál.
To’o agora, família afetada sira sei hein informasaun ofisiál kona-ba mekanizmu kompensasaun, montante indemnizasaun no kalendáriu final ba implementasaun projetu ne’e.
Jornalista: Camilio de Sousa
Editór: Filomeno Martins
