Stock ai-han sufisiente iha merkadu nasionál
DILI, 06 Novembru 2026 (TATOLI) – Ministériu Komérsiu no Indústria (MKI) monitoriza hela stock ai-han iha armazein importadór sira no konklui katak stock sufisiente atu responde ba impaktu petensiál husi fenómenu El Niño.
Diretora Nasionál Regulasaun Komersiál, Manuela da Silva, hatete relasiona ho fenómenu ne’e ministériu monitoriza mós folin nesesidade bázika sira iha Dili, inklui munisípiu hatudu katak folin normál tanba stock iha armazein empreza importadór sira sufisiente no garantidu hasoru situasaun ne’e.
“Monitorizasaun ita kontinua halo bá munisípiu sira ne’ebé dook husi Dili, liuliu postu administrativu sira hanesan Iliomar, Letefoho, Uatukarbau, Fatuberliu, inklui Bazartete hodi haree folin sasán, ne’ebé hatudu presu normál”, Manuela da Silva hatete ba Tatoli, ohin.
Iha monitorizasaun ne’e halo mós entrevista ho komunidade katak folin sasán iha munisípiu normál, tanba iha foho ne’e loja-na’in sira lori foos to’o bá komunidade sira-nia fatin.
Tuir observasaun ne’ebé ekipa halo bá iha armazein sira kada empreza importadór sira, stock foos sufisiente, hanesan empreza importadór Lisun stock foos tonelada 1.440.150, Perissos iha armazein rua, ne’ebé kada armazein ida iha foos tonelada 9.815.855, Timor Food iha tonelada 586.365 no foos iha dalan atu mai tan tonelada 153.76.
Tuir nia, folin fo’os marka Paz ho todan kilógrama (kg) 20 mak $9, enkuantu ba todan kilógrama 25 folin $11,25. Marka Folsom 20kg folin $15,25.
Aleinde ne’e, Sentru Lojístika Nasionál (CLN) mós tinan ne’e sei halo akizisaun ba foos tonelada 3.200 ho totál orsamentu $581.599.
Notísia relevante: CLN iha stock foos sufisiente atu atende ba situasaun emerjénsia
Jornalista: Arminda Fonseca
Editora: Maria Auxiliadora
