ADN halo verifikasaun previa ba projetu infraestrutura hamutuk 462
DILI, 15 Outubru 2025 (TATOLI)—Ministériu Planeamentu no Investimentu Estratéjiku (MPIE) liuhusi Ajénsia Dezenvolvimentu Nasionál (ADN) halo verifikasaun previa ba projetu infraestrutura hamutuk 462, no halo inspesaun ba projetu hamutuk 564 hahú husi fulan-Janeiru to’o Outubru 2025.
Diretór Interinu Ajénsia Dezenvolvimentu Nasionál, Januário M. Guterres, hateten ADN iha papél servisu prinsipál rua mak hanesan halo verifikasaun previa ba projetu infraestrutura no halo fiskalizasaun ba inspesaun projetu insfraestrutura.
“Entaun husi servisu prinsipál rua ne’e to’o horiseik kuaze iha projetu hamutuk 462 mak ami verifika hotu ona no kontinua haruka ona ba dono do projetu, tanba ami lahalo prosesu aprovizionamentu. Enkuantu kona-ba inspesaun ba projetu hamutuk 564 no rekomenda halo pagamentu,” Adjuntu Diretór Interinu ne’e informa ba Agência Tatoli iha nia kna’ar fatin, Fatuhada, ohin.
Diretór ne’e esplika, bainhira ADN haruka ona ba dono do projetu, karik orsamentu prevee iha fundu infraestrutura entaun dono do projetu sei haruka ba Konsellu Administrasaun Fundu Infraestrutura (KAFI) halo aprovasaun, hafoin kontinua lori ba Komisaun Nasionál Aprovizionamentu (CNA).
Maibé, nia ddehan, bainhira orsamentu prevee iha ministériu rasik mak normalmente sei haruka ba dono do projetu hodi halo prosesu aprovizionamentu.
Entretantu, husi totál projetu sira-ne’ebé kompostu husi kategorizasaun rua ne’e barak-liu mak projetu estrada rurál no rejista mós projetu konstrusaun edifísiu hamutuk 10.
“Tanba iha tinan kotuk ami foka halo verifikasaun ba estrada rurál nune’e iha tinan 2025 implementasaun barak-liu mak estrada rurál ne’ebé balun atinje ona 50% no balun finaliza ona,” nia hateten.
Jornalista : Alexandra da Costa
Editór : Cancio Ximenes
