DILI, 26 Jullu 2025 (TATOLI)–Mai ho liman mamuk fila ho medalla. Atu konkretiza medalla la’ós fila-liman de’it hetan kedas medalla maibé hakat liu prosesu difísil. Sosa ho kanek, tohar no xamada iha kampu durante minutu 90 nia laran.
Kabuverde konsege hakat liu prosesu moruk ida-ne’e. Ohin, nia hamriik ona iha palku vitória nia leten hodi simu nia vitória sai kampiaun ba finál kompetisaun modalidade futeból iha Jogu Desportivu Komunidade Nasaun Sira Lian Portugés (CPLP-sigla portugés) ba dala-XII 2025 ne’ebé hala’o iha Estádiu Munisípál Dili, Sábadu loraik ne’e.
Kabuverde lakohi nia dignidade monu no lakohi desepsiona nia nasaun. Tan ne’e, iha jogu kontra Angola, maski sira rua kontinente ida (Áfrika) maibé la’ós obstákulu. Jogu ne’e jogu. Importante manán atu dignifika nasaun.
Filozofia ida-ne’e, hametin Kabuverde nia espíritu luta. Luta nia finalidade mak Angola nia derrota. Angola hakarak ka lakohi tenke hakruuk ba Kabuverde ho vitória mihis 4-3 ne’e.
Jogu entre ekipa rua hakur liu sekuénsia oinoin. Iha parte dahuluk, Angola no Kabuverde hetan oportunidade maibé la ezekutadu. La’ós tanba lakohi halo golu maibé leet mak laiha de’it. Defeza ekipa rua halo defeza ba malu hodi evita fura malu. Dada malu to’o primeira parte ramata ho skor 0-0.
Hafoin ramata intervalu, hakat bá segunda parte. Ekipa rua kontinua ho idak-idak nia rítmu. Tantu Angola no Kabuverde, uza fórma ofensiva. Bola la oras iha grandeia maibé baliza rua la ameasadu.
Baliza livre husi ameasa, signifika iha fukun. Nune’e, Kabuverde hahú ho inisiativa halo mudansa ba matadór (jogadór). Jogadór Andrade (18) substitui Victór Timas (13) iha minutu 51 no minutu 60 jogadór Marcos Morais (16) substitui Ramos (2).
Angola mós sente fukun ne’e iha. Entaun, iha minutu 53, 62 no 69, sira hatama jogadór Manuel Pires (11) troka Baptista (17), Ferrão (7) troka Pedro António (15), Mario Ngola (16) troka Paulo Luvumbo (9).
Ho mudansa jogadór husi parte rua, halo rítmu jogu ne’e hetok aas. Jogu hahú partu daudaun rezultadu. Sorte monu uluk ba Kabuverdianu sira. Kabuverde lidera uluk golu 1-0 liuhusi golu ne’ebé fábrika husi Jadilson Ribeiro (11) iha minutu 79.
Angola sente ameasadu ho Kabuverde nia golu dahuluk ne’e. Tan ne’e, nia komesa enjeñaria tan ninia matadór sira. Hatama Alexmar (14) troka jogadór Manuel Morais (2). Mudansa iha progresu duni. Liu de’it minutu 4, ekipa Angola responde kedas golu hodi muda skor sai 1-1. Golu referidu maihusi jogadór Kabuverdianu nia erru. Erru komete husi jogadór Lezito Andrade (18) hasoru jogadór Angola, Edilson Domingos (10) iha grandeia. Nune’e, obriga árbitu despaxa pena hasoru Kabuverde. Bola penaltu. Angola konsege ezekuta penaltu ho di’ak liuhusi jogadór João Capitão (8) iha minutu 84. Skor impata 1-1.
Ekipa rua la konsege iha kbiit hodi muda skor impata ne’e. To’o minutu ikus 80+7, tabela skor kontinua impata 1-1. Ne’e duni, ekipa rua tenke hakotu jogu iha sesaun penalidade. Iha penalidade, laiha dúvida Kabuverde sai vensedór ho golu mihis 4-3.
Jornalista: Natalino Belo
Editór: Xisto Freitas da Piedade
