MANUFAHI, 26 Jullu 2025 (TATOLI)-Prezidente autoridade munisipál Manufahi, Luís Marçal da Costa Tavares, hateten hanesan dirijente prontu simu polítika podér lokál ne’ebé sei implementa iha tinan-2026.
Prezidente autoridade munisipál Manufahi ne’e afirma, preparasaun hodi ajuda iha avaliasaun kondisaun mínima ni’an maka sei haree kona-ba rekursu umanu, infrastrutura bázika, edukasaun no saúde,
“Ita prepara hela prosesu sira-ne’e, ita mós komesa enkoraja agrikultór sira liuhusi sosializasaun atu iha vontade kontinua dezenvolve setór agrikultura hodi hamoris ida-idak nia-an”, autoridade munisipál ne’e ba jornalista sira iha serimónia inaugurasaun fornesimentu bee-moos iha postu Fatuberliu, suku Klakuk, Mangufahi, sábadu-ne’e.
Autoridade ne’e informa, maske iha infrastrutura bázika balun mak seidauk hadi’a, maibé Governu kontinua normaliza hanesan estrada, no ponte sira.
“Iha eransa no garante katak Manufahi oan prontu atu hakat ba kámara munisipál iha tinan-2026”, nia garante.
Antes ne’e Diretór Jerál Dezentralizasaun no Governu Lokál, António Agosto Guterres, hatete konseitu podér lokál no dezentralizasaun administrativa mak atu hakbesik servisu sira ba populasaun liuhusi autoridade lokál.
Implementasaun programa ne’e bazeia ba lei-inan artigu nú. 5 ne’ebé ko’alia kona-ba administrasaun públika, oinsá respeita prinsípiu dezentralizasaun.
Notísia relevante: PM Xanana husu Kovalima-oan prepara simu desentralizasaun administrativa no podér lokál
Jornalista : Alexandra da Costa
Editora : Rita Almeida
