DILI, 12 Outubru 2025 (TATOLI)– Ajénsia TATOLI, aban (13/10) iha Postu Administrativu Maubisse, Munisípiu Ainaru, realiza diálogu komunitária ho tema ‘Prezidente Ramos-Horta ho povu’.
Ajénsia TATOLI realiza programa rua iha Pouzada Maubisse, dadeersan programa Talk Show entre Sekretáriu Estadu Komunikasaun Sosiál, Expedito Días Ximenes no Prezidente Autoridade Munisípiu Ainaru, Aileu, Manufahi no Kovalima, ho programa Tatoli Hakbesik.
Parte lokraik realiza diálogu komunitária ho tema “Prezidente Ramos-Horta ho Povu” no oradór prinsipál mak Prezidente Repúblika, José Ramos-Horta, ne’ebé sei ko’alia direita ho komuniade sira.
Diálogu komuniaariu ne’e, hanesan programa TATOLI nian ne’ebé lansa ona ho naran ‘Tatoli Hakbesik” ho objetivu atu lori Estadu besik ba povu.
Diálogu ne’e kompostu husi Munisípiu Ainaru, Aileu, Kovalima no Manufahi. Programa ne’e realiza iha Pouzada Maubisse.
Administradór Postu Administrativu Maubesi, Joaquim Salcinha Soares, agradese ba TATOLI bele realiza programa ne’e hodi lori Prezidente Repúblika José Ramos-Horta besik ba komunidade Maubisse.
“Agradese tebes ba mídia TATOLI, tanba iha inisiativa di’ak hodi realiza programa diálogu ne’e, lori ita-nia Prezidente Repúblika mak direita ko’alia ho lomunidade sira iha-ne’e, nune’e bele rona mós preokupasaun husi povu sira,” Admimistradór ne’e hateten ba TATOLI iha Maubisse, domingu ne’e.
Nia dehan, fatin ba diálogu sei hala’o iha Pauzada Maubisse ne’ebé sei partisipa mós husi Prezidente Autoridade Munisípiu (PAM), Ainaru, Aileu, Manufahi no Kovalima.
“Prezidente Autoridade haat (4) mak sei partisipa iha diálogu ne’e, hamutuk ho komunidade Maubisse sira, ita preparadu ona atu realiza atividade ne’e tanba servisu hamutuk ho TATOLI,” nia hateten.
Iha diálogu Komunitáriu ne’e, Xefe Estadu, José Ramos-Horta sei aprezenta nia perspetiva kona-ba dezenvolvimentu nasionál no rona mós preokupasaun husi autoridade munisipál no komunidade Postu Maubisse.
Programa Tatoli Hakbesik inísia husi Ajénsia Notisioza Timor-Leste, TATOLI, I.P atu hakbesik Xefe Estadu bá iha povu nia-leet.
Atividade ne’e, organiza husi TATOLI, I.P, servisu hamutuk ho Administradór Postu Administrativu Maubesi no hetan apoia husi AQUAFU Company no East Timor Trading Group.
Jornalista: Hortencio Sanchez
Editór: Evaristo Soares Martins
