MAUBISSE, 13 Outubru 2025 (TATOLI)—Prezidente Repúblika, José Ramos-Horta, apresia Agência TATOLI, I.P ne’ebé susesu realiza programa “Prezidente Ramos-Horta ho Povu” iha Postu Administrativu Maubisse, Munisípiu Ainaru.
“Agradese no apresia tebes ba TATOLI bele realiza ona programa ida-ne’e. Ha’u prontu atu la’o ho ita-boot sira iha fatin seluk ho programa ida-ne’e,” Ramos Horta hateten hafoin taka programa diálogu ho komuniade Maubisse iha Pauzada Maubisse, segunda ne’e.
Nia dehan, bainhira TATOLI atu realiza programa ne’e iha munisípiu seluk bele koordena ho Palásiu Prezidensiál hodi servisu hamutuk.
“Bainhira atu hala’o tan ativiade ne’e, bele komunika ho ha’u-nia gabinete atu servisu hamutuk,” Horta tenik.
Aleinde ne’e, Prezidente Ramos-Horta mós apresia ba Prezidente Autoriade Munisípiu haat (4) hanesan Kovalima, Ainaru, Aileu no Manufahi ne’ebé partisipa másimu iha atividade ne’e.
Diálogu komunitariu ne’e oradór prinsipál mak Xefe Estadu José Ramos-Horta ne’ebé akompaña husi Sekretáriu Estadu Komunikasaun Sosiál (SEKOMS), Expedito Dias Ximenes, PAM Munisípiu haat (4), Autoridade lokál Maubisse no komunidade Maubisse.
Entretantu, programa “Prezidente Ramos-Horta ho Povu” hanesan programa ida husi Agência TATOLI, I.P nia programa prinsipál “TATOLI HAKBESIK.
Programa ‘Ramos-Horta ho Povu’ hanesan meiu ida atu lori Estadu besik liu ba povu no rona direita preokupasäun husi povu.
Jornalista : Hortencio Sanchez
Editór : Cancio Ximenes
