KOVALIMA,10 Jullu 2025 (TATOLI)— Primeiru-Ministru, Kay Rala Xanana Gusmão, husu ba Kovalima-oan atu kria unidade no akumula inteletuál inklui Joven sira atu hahú prepara-an simu Implementasaun Polítika desentralizasaun administrativa no podér lokál.
Primeiru-ministru hato’o asuntu ne’e iha diálogu ho komunidade, autoridade lokál no autoridade munisipál suku iha Postu Administrativu Fohorem, bainhira sosializa programa desentralizasaun administrativa no podér lokál.
Notísia relevante: Xanana konsidera desentralizasaun hanorin servidór Estadu atu serbí povu
“Governu sentrál atu haree ba Timór tomak susar tebes tanba ne’e mak iha polítika desentralizasaun administrativu no podér lokál hodi fó póder ba Governu lokál mak di’ak liu nune’e administradór postu hamutuk ho xefe suku no joven sira diskute hodi prevee orsamentu ba prioridade sira”, Xefe Governu ne’e partilla informasaun iha postu administrativu Fohorem, ohin.
Atu estabelese Governu lokál ne’e, hakbesik ba povu, PM Xanana afirma liuhusi implementasaun desentralizasaun administrativa no podér lokál bele fó responsabilidade ba suku hotu aprezenta nia prioridade.
“Tanba ne’e Kovalima-oan sira estudu sai matenek labele baruk-teen, bainhira implementa Governu lokál ne’e Kovalima-oan mak jere. Implementasaun dezentralizasaun administrativu di’ak liu, maske la bolu ministru maibé asembleia lokál, deputadu iha munisípiu hatene bainhira atu aprova orsamentu saida mak la la’o atu haree hodi dudu ita-nia dezenvolvimentu”, katak PM Xanana.
Líder Ezekutivu ne’e dehan dezenvolvimentu la’ós haree ba infraestrutura de’it, maibé ekonómia mós la’o ho nune’e presiza fó atensaun ba munisípiu Kovalima nune’e ajuda ekonómia ho neneik tanba hala’o dezenvolvimentu seidauk finaliza.
“Ha’u mai atu haree didiak estrada hotu kle’ur la halo prepara bainhira kadoras mai Kovalima la’ós kapitál munisípiu mak hetan benefisiu, maibé bele mai iha postu sira”, dehan Eis Prezidente-Repúblika ne’e.
Notísia relevante: https://tatoli.tl/2025/02/12/kaleidoskopiu-preparasaun-ba-implementasaun-poder-lokal-no-desentralizasaun-administrativa/
Jornalista:Celestina Teles
Editór: Florencio Miranda Ximenes
