Autoridade Kovalima planu konstrui edifísiu Administrasaun Munisipál iha suku Beco
KOVALIMA ,28 Jullu 2025 (TATOLI) – Autoridade Munisípiu Kovalima iha planu konstrui edifísiu Administrasaun munisipál Kovalima (AMK), iha aldeia Haemanu, suku Beco, postu Administrativu Suai.
Prezidente Autoridade Kovalima, Miguel Armada Cardoso, dehan ba konstrusaun Edifísiu Administrasaun Munisipál halo ona diálogu ho komunidade sira iha suku Beco.
“Razaun Autoridade Kovalima foin lalais hala’o diálogu ho komunidade hodi rona komunidade nia halerik ho opiniaun. Ita hotu konkorda la’o la konkorda, maibé iha planu no mehi ba konstrusaun” PAM, Miguel Armada Cardoso hato’o ba jornalista sira iha Kovalima.
Planu autoridade Kovalima konstrui edifísiu AMK iha Suku Beco ho iha nia vantajen aumenta movimentu, empreza kii’k oan sira bele hadia-an,ema bele aluga uma sira, fasil atu trata dokumentu tanba hakbesik ona komunidade.
“Tuir ba rezultadu diálogu komunidade-sira apoiu planu Autoridade munisípiu Kovalima atu konstrui edifísiu administrasaun iha suku Beco, tanba ne’e autoridade Kovalima hato’o agradese ba katuas adat,inteletuál, Veteranu no parte hotu fi’ar katak planu ida-ne’e natureza hamutuk ho ita “, nia dehan.
Iha biban hanesan, Inteletuál husi Suku Beco, Marito Moniz, dehan komunidade sira aseita planu Prezidente Autoridade Munisípiu Kovalima hodi dezenvolvementu la’o ba oin, maibé presiza tuir prosesu kona-ba rai.
“Ita atu halo dezenvolvimentu iha rai-nia leten rai ne’ebé avo sira husik mai ita. Bainhira ita-nia planu realiza duni konstrui edifísiu iha Aldeia Haemanu hanesan sentru ba munisípiu afeita maka’as ba komunidade. Ha’u husu ba autoridade presiza aprezenta dezeñu, nune’e inan-aman bele hatene atu konstrui edifísiu uza rai etare hira”, nia afirma.
Alende ne’e, Jonas Maia aseita planu atu konstrui edifísiu iha aldeia Haemanu hodi muda kapitál suai mai iha suku Beco.
“ Ita ofrese rai ba Estadu atu halo dezenvolvimentu, maibé komunidade sira mak sei lakon rai presiza hanoin, maibé hanesan Beco oan aseita atu halo dezenvolvimentu tenke haree analiza no esplika didiak benefísiu no oportunidade ba komunidade afetadu sira,” nia afirma.
Entertantu, Diretór Terra no Propriedade, Carlos Caetano, klarifika katak Estadu liuhusi Governu da-sia nia iha planu dezenvolvimentu la’ós atu ba kotuk , maibé tenke la’o ba oin mezmu lentu.
“ Ita hotu presiza fó liman ba malu hodi simu todan-ne’e tanba lei númeru 1 ko’alia kona-ba direitu ba rai bainhira Estadu atu uza rai privadu sei konsidera direitu na’in ba rai, maibé la’ós terra no propriedade mak fó indeminizasaun “, nia esplika
Servisu Terra no Propriedade atu halo jestaun hodi fó apoiu tékniku no júridika hodi hetan nia solusaun bainhira planu ba futuru edifísiu munisípiu kontrui duni iha aldeia Haemanu.
Jornalista :Celestina Teles
Editór:Florencio Miranda Ximenes
