Blanku rejistu kriminál iha Vikeke kontinua emprimidu ho suratahan-mutin
VIKEKE, 28 Jullu 2025 (TATOLI)—Diretór Servisu Rejistu no Notariadu Munisípiu Vikeke, Rogério da Costa informa blanku ba rejistu kriminál kontinua emprimidu ho suratahan-mutin tanba orijinál stock out.
“Durante ne’e blanku orjinál iha stock out, tan ne’e Servisu Rejistu no Notariadu Munisípiu Vikeke emprime de’it ho suratahan-mutin mak distribui ba ita-nia abitante sira-ne’ebé trata dokumentu rejistu kriminál,” Rogério da Costa ba TATOLI iha ninia kna’ar fatin, Beloi, Segunda ne’e.
Nia esplika emprime ho suratahan-mutin bele asesu ba instituisaun sira tanba iha asinatura nune’e ema nafatin konsidera.
“Blanku orijinál laiha ne’e la’ós iha Munisípiu Vikeke de’it, maibé iha nasionál mós laiha. Ami nafatin hein bainhira mak blanku orijinál nasionál distribui mai. Kuandu blanku orijinál iha ona, ita-nia populasaun sira-ne’ebé kaer suratahan-mutin bele mai troka ba orijinál,” nia hato’o.
Rogério haktuir katak blanku orijinál ne’e stock out hahú kedas husi fulan-Fevereiru to’o agora.
Kona-ba dokumentu rejistu kriminál hahú husi fulan-Janeiru to’o fulan-Jullu, Servisu Notariadu Munisípiu Vikeke prodús hamutuk 2004.
Tuir dadus, funsionáriu daudaun Servisu iha Notariadu Munisípiu Vikeke hamutuk na’in-15 hodi atende komunidade.
Jornalista: Vitorino Lopez da Costa
Editór: Xisto Freitas da Piedade
