DILI, 28 Jullu 2025 (TATOLI)—Governu liuhosi Ministériu Juventude, Desportu, Arte no Kultura (MJDAK), Segunda ne’e, atribui subsídiu ba atleta, treinadór inklui asisténsia treinadór hafoin eventu Jogu Desportivu Komunidade Nasaun Sira Lian Portugés (CPLP-sigla portugeza) ramata.
Xefe Misaun Atuál Diretór Jerál Desportu MJDAK, João Rodrigues esplika Governu deside fó subsídiu tanba baibain atleta sira partisipa liuliu envolve iha kompetisaun internasionál sempre iha subsídiu.
“Sira iha direitu atu hetan subsídiu tuir saida mak ita prepara ba ita-nia kontijénsia iha Jogu Desportivu CPLP,” Xefe Misaun Atuál Diretór Jerál Desportu MJDAK informa ba TATOLI iha Otél Ramelau, Aimutin.
João Rodrigues relata bazeia ba desizaun kontijénsia Timor-Leste Governu subsídiu bazeia ba kna’ar tuir kategória hanesan treinadór prinsipál sei iha direitu $250, asisténsia treinadór $150 no kada atleta $100.
Subsídiu hirak-ne’e variente bazeia ho duransaun relasiona ho preparasaun hanesan atleta eleminadu iha direitu fulan-ida, suplente fulan-rua no altleta prinsipál fulan-tolu.
“Ida-ne’e hanesan apoiu subsídiu ba sira hanesan rekompensa tanba halo serbisu ne’ebé di’ak,” João tenik.
Totál atleta ne’ebé hetan subsídiu husi Ministériu Juventude, Desportu, Arte no Kultura (MJDAK) hamutuk atleta na’in-56, enkuantu treinadór prinsipál na’in-sia no asisténsia treinadór na’in-sia ne’ebé aloka orsamentu hamutuk rihun $40-resin.
Nia salienta Governu liuhosi MJDAK planeia atu atribui mós bónus ba atleta sira-ne’ebé hetan prestasaun iha jogu Desportu CPL ne’ebé sei fó direta husi liuhosi Ministru Nelyo Isaac Sarmento.
Antes ne’e, reuniaun konsellu aprova ona projetu dekretu-lei ne’ebé aprezenta hosi Ministru Juventude, Desportu, Arte no Kultura, Nelyo Isaac Sarmento kona-ba subsídiu disponibilidade no dedikasaun nian iha ámbitu Jogu Desportivu CPLP ba dala-XII tinan 2025 iha Timor-Leste.
Diploma ne’e ho objetivu atu rekoñese esforsu no garante disponibilidade totál hosi elementu sira ne’ebé envolve iha organizasaun no partisipasaun Timor-Leste nian iha Jogu Desportivu CPLP ba dala-XII, ne’ebé sei hala’o hosi loron 17-27 Jullu 2025.
Jornalista: Natalino Belo
Editór: Xisto Freitas da Piedade
