DILI, 28 Jullu 2025 (TATOLI)—Governu liuhosi Ministériu Juventude, Desportu, Arte no Kultura (MJDAK) nafatin iha kompromisu koordena ho kada federasaun iha Timor-Leste nune’e fasilita no garante prestasaun atleta iha futuru.
Ministru Juventude, Desportu, Arte no Kultura, Nelyo Isaac Sarmento esplika Jogu Desportu Komunidade Nasaun Sira Lian Portugés (CPLP-sigla portugeza) ne’ebé ramata ona sai barómetru nune’e Governu kontinua fasilita no halo koordenasaun ho federasaun desportiva para kria kondisaun ba atleta sira iha Timor-Leste.
“Governu ne’e atu fasilita no asegura ba planu ne’ebé federasaun desportiva sira iha nune’e bele kontinua garante ba ita katak iha atleta nasionál,” Ministru Nelyo Isaac Sarmento informa ba TATOLI iha salaun konferénsia Ministériu Negósiu Estranjeiru no Kooperasaun (MNEK), Praia dos Coqueiros, Segunda ne’e.
Governante ne’e salienta liuhosi jogu CPLP Timor-Leste iha ona atleta ne’ebé sei idade ki’ik ho kategoria sub-15 maibé kada federasaun desportiva presiza iha planu no relata ba Governu liuliu kona-ba sustentabilidade atleta nian.
“Governu sente katak tenke iha atividade ba desportu sira-ne’e barak liután nune’e loke oportunidade ba atleta sira ne’ebé iha poténsia,” nia informa.
Nelyo hateten hafoin kompetisaun CPLP, Governu kontinua iha kompromisu no disponivel atu apoia liuhosi finansia atividade sira-ne’ebé realiza husi kada federasaun hanesan kria kompetisaun entre atleta sira liuhosi eventu kampionatu nasionál.
Aleinde ne’e, Governu mós iha planu atu investe ba setór infraestrutura tanba liuhosi atividade desportu bele hametin liután koezaun nasionál hanesan siviliza juventude no saúde ne’ebé di’ak nune’e fó oportunidade dezenvolve Timor-Leste.
Jornalista: Natalino Belo
Editór: Xisto Freitas da Piedade
