Líder Tailándia no Kamboja hasoru malu iha Malázia hodi halo konversasaun dame
DILI, 28 Jullu 2025 (TATOLI) – Líder sira hosi Tailándia no Kamboja sei hala’o konversasaun iha Malázia iha loron-segunda ne’e hodi hetan sesárfogu iha sira-nia disputa fronteira ne’ebé rezulta ema 200.000 maka evakua husi zona fronteira.
Governu Tailándia nian hatete katak partisipa iha konversa sira-ne’ebé organiza hosi Malázia iha nia knaar hanesan prezidente hosi bloku rejional ASEAN nian, enkuantu primeiru-ministru Kamboja nian, Hun Manet, hatete katak konversa sira-ne’e ko-organiza hosi Estadu Unida Amérika ho partisipasaun hosi Repúblika Populár Xina.
Sekretáriu Estadu husi Estadu Unida Amérika nian, Marco Rubio, hatete katak ofisiál Departamentu Estadu nian iha Malázia hodi tulun esforsu sira dame nian, hafoin Prezidente Donald Trump hatete antes katak nia hanoin katak líder rua ne’e hakarak rezolve konflitu.
“Ami hakarak atu konflitu ida-ne’e hotu lalais liután,” Rubio informa liuhusi nota imprensa ne’ebé Ajénsia TATOLI asesa husi Reuters, segunda ne’e.
“Ofisiál Departamentu Estadu nian iha terrenu iha Malázia hodi tulun esforsu sira dame nian ne’e.”
Tensaun entre Tailándia ho Kamboja aumenta maka’as dezde oho iha fulan-maiu nia rohan hosi soldadu kambojanu ida durante konfrontu badak ida iha fronteira. Tropa fronteira sira hosi parte rua hetan reforsu iha krize diplomátika ida ne’ebé maka lori governu koligasaun frajil Tailándia nian besik atu monu.
Ostilidade sira mosu iha Kinta-feira liubá no sai hanesan funu aat liu entre viziñu sira sudeste aziátiku nian iha dékada ida liubá.
Númeru hosi ema mate sira sa’e liu ona 30, inklui ema sivíl liu 20, enkuantu autoridade sira informa katak ema liu 200.000 maka evakua ona hosi zona fronteira sira.
Primeiru-ministru Malázia nian, Anwar Ibrahim, propoin ona konversasaun sira sesárfogu nian, lakleur de’it hafoin disputa fronteira nian mosu iha konflitu iha kinta-feira, no Xina ho Estadu Unidu Amérika mós oferese atu tulun iha negosiasaun sira.
Tailándia hatete ona katak apoia apelu sira ba sesárfogu iha prinsípiu maibé hakarak halo negosiasaun bilateralmente, enkuantu Kamboja husu ona ba envolvimentu internasionál.
Anwar hatete katak nia hein atu prezidi negosiasaun sira hafoin hetan husu hosi reprezentante sira hosi Governu rua ne’e hodi tenta hetan akordu dame nian, fó-sai ajénsia notisioza Malázia nian, Bernama.
“Entaun, ha’u diskute hela parámetru sira, kondisaun sira, maibé buat-ne’ebé importante maka (sesarfogu) imediatu ida,” nia hatete iha loron-domingu ne’e.
Notísia relevante: Kamboja apoia proposta sesárfogu hodi rezolve konflitu ho Tailándia
TATOLI
