MSSI prioriza benefisiáriu pensaun sosiál ho kondisaun fraka
DILI, 28 Jullu 2025 (TATOLI)–Vise-Ministra Solidariedade Sosiál no Inkluzaun, Céu Brites apela ba benefisiáriu pensaun sosiál ne’ebé kondisaun fraka informa ba ekipa pagamentu atu bainhira ramata pagamentu iha sentru kontinua kedas bá sira-ne’ebé kondisaun defisiénsia, fraku no moras sira.
Vise-Ministra Céu Brites dehan asuntu ne’e relasiona ho idoza ida mate iha sentru pagamentu iha Suku Mau Ubo, Hatulia B, Ermera, bainhira mai simu nia pensaun sosiál.
“Asuntu kona-ba ita-nia inan ka avó ne’ebé mate iha pagamentu fatin iha Hatulia B ne’e ita lahatene nia kondisaun tanbasá mak mate. Maibé, mensajen prinsipál mak ne’e, bainhira ha’u rasik bá halo observasaun ha’u sempre apela ba inan-aman no avó sira katak se sira atu simu pagamentu mak sente ladún di’ak tenke informa ba ita-nia autoridade lokál iha fatin pagamentu no mós ita-nia ekipa INSS para depoiz pagamentu ramata bele bá sira-nia uma. Ha’u ko’alia beibeik ona katak kuandu moras banku bele bá paga iha uma,” governante ne’e dehan ba TATOLI iha edifísiu Ministériu Negósiu Estranjeiru no Kooperasaun (MNEK), Praia dos Coqueiros, Dili, Segunda ne’e.
Notísia relevante: Governu halo ona pagamentu pensaun sosiál ba idozu-invalides hamutuk rihun-120
Céu Brites hatutan idoza ne’e bele dehan moras tiha ona ka to’o ne’ebá mak fraka karik, ka sai husi uma la han buat ida.
“Ita lahatene tanba ita la’ós doutora maibé atu dehan de’it katak ekipa INSS hamutuk ho Banku Nasionál Komérsiu Timor-Leste (BNCTL-sigla portugeza) inklui autoridade lokál sempre bá selu iha uma kuandu moras. Ekipa kuandu halo pagamentu sempre fó prioridade ba ema ne’ebé moras,” nia haktuir.
Vise-Ministra Solidariedade Sosiál no Inkluzaun dehan pagamentu faze daruak nian ramata ona.
Entretantu, Prezidente INSS, Arlindo Pinto informa katak Governu liuhosi Institutu Nasionál Seguransa Sosiál (INSS) hamutuk ho BNCTL sei halo pagamentu ba pensaun sosiál iha fulan-ne’e.
“Pagamentu ba pensaun sosiál iha fulan-Jullu ne’e akontese entre loron 20 bá-oin,” Arlindo dehan iha nia kna’ar fatin, foin lalais ne’e.
Pensaun sosiál ne’ebé liga ba ema ho defisiénsia sira, INSS selu ona ema hamutuk 10.437 no pensaun sosiál ba ferik-katuas mak 97.359.
“Númeru ne’e ita mantein iha trimestre daruak ho osan millaun $33.9. Ida-ne’e inklui ona ho osan retroativu hosi munisípiu lima hosi fulan-Outubru to’o Novembru 2024 nian,” Pinto esplika.
Antes ne’e, iha inísiu tinan-2024, INSS halo pagamentu pensaun sosiál ne’ebé fahe ba kategoria tolu ho nia valór pagamentu lahanesan. Kategoria idade 60-70 ho valór $60, idade 70-80 ho valór $80 no idade 80 ba leten ho nia valór $100.
Iha parte seluk, Prezidente Autoridade Munisípiu Ermera, José Martinho do Santos Soares hateten Autoridade Munisipál Ermera implementa pagamentu iha uma ba idoza invalidés ne’ebé ho kondisaun defisiénsia ka moras.
Prezidente Autoridade Munisipál Ermera dehan kestaun ne’e relasiona ho idoza ida mate iha Suku Mau Ubo bainhira bá simu nia direitu.
“Ha’u simu informasaun idoza ida mate iha Suku Mau Ubo ho idade 60-resin. Ne’e hosi uma mai ho saúde di’ak. Nia forma hela mak ataka derepente monu mate kedas. Ne’ebé, ha’u suspeita ba kurasaun. Tanba baibain ema di’ak mak monu mate derepente ne’e atakasaun kurasaun,” Prezidente Autoridade informa ba TATOLI via telefónema, foin lalais ne’e.
Nia esplika sede suku ida atu fahe osan la’ós suku idoza ne’e nian, maibé tanba suku ne’ebé nia mate ba ne’e besik nia hela fatin.
“Ami-nia planu ne’e kle’ur ona atu bá selu idoza sira-ne’ebé moras iha sira-nia uma. Maibé, ba sira ne’ebé saúde di’ak ne’e bele ba simu iha sede suku ka fatin pagamentu,” José tenik.
Jornalista : Osória Marques
Editora : Julia Chatarina
