Suku Makadike de Cima falta Xefe Juventude Feto
VIKEKE, 28 Jullu 2025 (TATOLI)—Xefe Suku Makadike de Cima, Postu Administrativu Uatulari, Afonso dos Reis informa Suku Makadike de Cima daudaun ne’e seidauk kompleta Xefe Juventude Feto.
“Uluk ami iha Xefe Juventude Feto, depois suku fahe tiha ba tolu, entaun Xefe Juventude feto ne’e inklina ba fali suku Makadike de Baixo. Tan ne’e, ami-nia agora seidauk hili fali Xefe Juventude Feto,” Afonso informa ba TATOLI iha Postu Vikeke Vila, Segunda ne’e.
Autoridade ne’e hatutan presiza kompleta estrutura konsellu suku atu hala’o sira-nia kna’ar iha suku tanba Xefe Juventude Feto ne’e importante hodi organiza feto maluk sira.
“Atu kompleta estrutura ne’e, ha’u hato’o ona pedidu ba munisípiu para fó dalan ba ami hodi kompleta ami-nia estrutura liuliu Xefe Juventude Feto, maibé to’o agora seidauk fó resposta,” nia hato’o.
Hatán ba preokupasaun ne’e, Diretór Munisipál Asuntu Apoiu Sosiedade Sivíl, Cosme Sarmento haktuir daudaun ne’e Ministériu Administrasaun Estatál (MAE) distribui ona karta sirkulár foun mai munisípiu hodi kompleta estrutura suku la’o tuir sikulár.
“Karta sirkulár foin lalais MAE haruka mai ona, ami sei distribui ba kada suku sira atu la’o tuir karta sirkulár. Nune’e mós sei koordena ho Sekretaria Téknika Administrasaun Eleitoról (STAE) hodi haree matadalan no lista kandidatu sira. Bainhira koordenasaun hotu, ami sei informa ba suku hodi realiza enkontru ida hodi hasai ata ba substituisaun. Ami ho STAE sei akompaña prosesu sira. Ha’u sente tempu badak sei realiza bazeia ba karta sirkulár,” nia informa.
Suku Makadike de Cima iha aldeia hamutuk ualu (8), totál uma-kain 420 no totál abitante hamutuk na’in-600.
Jornalista: Vitorino Lopez da Costa
Editór: Xisto Freitas da Piedade
