DILI, 28 Jullu 2025 (TATOLI) – Ajénsia Notisioza Timor-Leste-Tatoli I.P komemora nia aniversáriu ba da-9 ho selebrasaun misa agradesimentu iha igreja Motaél, ohin.
Iha selebrasaun eukaristia ne’e, amu selebrante, Padre Waldimeiro Viana, hateten mídia nia serbisu mak tatoli informasaun sira. Liuhusi informasaun iha poténsia boot ba ema-nia moris, informasaun hanesan fini ida, nune’e informasaun saida de’it mak mídia fó sai ka fahe sei determina ba sosiedade Timór iha futuru.
“Ita-boot sira mós hola responsabilidade hanesan edukadór ba sosiedade, tanba ita-boot sira mak eduka ita-nia sosiedade ho informasaun”, Pe. Waldimeiro Viana hateten iha nia omília iha igreja Moatél, ohin.
Nia esplika mídia nia papél ida mak oinsá fahe informasaun ne’ebé justu, nune’e kontinua fahe informasaun ne’ebé di’ak hanesan fini di’ak, tanba sosiedade Timór nia moris atu sai depende ba informasaun ne’ebé Tatoli kari.
“Ita-boot sira mak sai dalan ba sosiedade ho informasaun saida de’it mak ita fó. Ita sai hanesan instituisaun ida, oinsá ita-nia dispozisaun fuan nian, kontinua fahe informasaun ne’ebé di’ak”, nia sujere.
Hafoin misa, Prezidente Konsellu Diretivu Tatoli, Noémio Falcão, agradese ba amu selebrante tanba liuhuis omólia haforsa tebes espíritu funsionáriu Tatoli nian.
Nia dehan Tatoli hahú husi ema na’in-hitu no to’o ohin loron sai ema barak no ida-ne’e hanesa susesu ida, maibé bainhira aumenta ema barak, dezafiu mós barak.
“Ami fiar katak ho misa ne’e Maromak haforsa liutan ami atu serbí públiku ho di’ak, liuhusi informasaun”, konklui.
Ajénsia Tatoli, I.P nu’udar ajénsia ofisiál estadu Timor-Leste nian. Ezisténsia ajénsia ne’e maihusi inisiativa Governu, liuliu Sekretaria Estadu Komunikasaun Sosiál (SEKOMS) iha Sestu Governu nia mandatu.
Tatoli nu’udar transformasaun hosi ETNA (East Timor News Agency) depois nakfila ba ANTIL (Ajénsia Notisioza Timor-Leste). Ajénsia Estadu ne’e hetan aprovasaun iha Konsellu-Ministru no públika iha Jornál Repúblika iha loron 14 Marsu 2016, nu’udar embriaun ho naran ANTIL.
ANTIL lansa husi Primeiru-Ministru, Rui Maria de Araújo, iha loron 27 Jullu 2016. Iha Marsu 2017, Konsellu-Ministru aprova ANTIL sai Tatoli, nu’udar ajénsia ofisiál Estadu Timor-Leste nian no publika iha Jornál Repúblika. Tatoli ho nia estatutu rasik nu’udar Institutu Públiku (IP).
Objetivu primeiru estabelese Ajénsia Estadu Timor-Leste mak sai fonte informasaun ofisiál Estadu sira Timor-Leste ne’ebé́ iha kapasidade no kbiit elabora produtu informasaun no notísia ne’ebé nesesita husi públiku, utilizadór informasaun iha eskalaun nasionál, rejionál no internasionál.
Segundu mak nu’udar implementadór Konstituisaun ne’ebé sai devér Governu nian atu fornese informasaun kredivel ho mós sai direitu informasaun sosiedade Timor- Leste ne’ebé garantidu husi artigu 40 no 41 iha Konstituisaun Timor-Leste nian.
Ajénsia Tatoli la’ós de’it sai produtora informasaun, maibé mós iha papél nu’udar “National information clearing house” (Uma-mahon ba fó-sai informasaun nasionál ho loloos): Iha tarrefa fó klarifikasaun no informasaun serteza, halakon misinformasaun (informasaun sala) no dezinformasaun (informasaun ne’ebé kontradís ho verdade).
Jornalista: Arminda Fonseca
Editora: Maria Auxiliadora
