Governu kapasita empreza sira iha Kovalima kona-ba dijitál negósiu
KOVALIMA, 29 Jullu 2025 (TATOLI)- Governu liuhusi Ministériu Turizmu no Ambiente, liuhusi Diresaun Nasionál Negósiu no Turizmu no Relasaun Internasionál partilla esperiénsia dijitál negósiu ba empreza sira iha munisípiu Kovalima.
“Ami-nia atividade formasaun negósiu ne’e hanesan planu anuál husi Diresaun Nasionál Negósiu no Turizmu ne’ebé prevee iha orsamentu 2025 ni’an “, Xefe Departamentu Negósiu no Relasaun Internasionál, Elisabeth Florensia Jerónimo, dehan ba jornalista sira iha salaun IADE Kovalima, ohin.
Nia dehan formasaun ne’e nia alvu mak na’in ba restaurante, gate house, grupu traballu sira iha Suai Loro. Atividade formasaun ne’e atu hasa’e sira-nia koñesementu ba Na’in ba sira oinsá halo promosaun sira-nia produtu liuhusi mídia sosiàl.
Tanba, Governu iha sentru formasaun iha Dili ne’ebé diariamente partisipante sira husu informasaun kona-ba turístiku, akomodasaun fasilidade ne’ebé mak fasilita turista sira liuhusi média sosiál ladun iha.
“Ami iha de’it pamfletu ne’ebé fasilita informasaun badak hodi hato’o ba bainaka sira vizita sentru informasaun turístiku ho objetivu ami prevee orsamentu hodi fasilita formasaun ba ita-nia empreza sira sira, nune’e sira bele halo promosaun liuhusi média sosiál tanba hodi ema fasil atu asesu informasaun”, nia dehan
Formasaun ida-ne’e atu tulun empreza sira oinsá sira bele promove ka halo promosaun ba sira-nia produtu ho kualker hala’o atividade hanesan eventu kulturál akomodasaun ho nia fasilidade sira.
Iha biban hanesan, Sekretáriu Munisipál Planeamentu Investimentu Dezenvolvimentu Integradu, Caetano dos Santos Ribeiro, dehan empreza sira iha Kovalima presiza fasilita formasaun ba sira.
“Ita presiza fasilita formasaun maske durante fasilita formasaun iha área sira seluk, maibé mós presiza kria kondisaun ligadu otelaria nian “, nia fó hafoin.
Iha formasaun ne’e, nia husu ba empreza sira atu kontinua promove produtu tradisionál sira, oinsá mak bele promove ba nasaun sira seluk liuhusi rede sosiál.
Entretantu, Na’in ba empreza, Aurelia Doutel Sarmento Vong, afirma agradese tanba sira presiza duni formasaun dijitál kona-ba negósiu, nune’e bele halo promosaun produtu sira.
“Ami hanoin konstrui gate house, restaurante no atividade sira seluk liuhusi fila liman ami presiza duni tuir formasaun kona-ba dijitál negósiu“, nia afirma.
Jornalista : Celestina Teles
Editór: Florencio Miranda Ximenes
