VIKEKE, 29 Jullu 2025 (TATOLI)—Xefe suku foun rua husi Suku Makadike de Baixo no Makadike Uaitame, Postu Administrativu Uatulari, Munisípiu Vikeke husu Autoridade Munisípál Vikeke aselera rekruta funsionáriu suku hodi apoiu servisu.
Xefe Suku Makadike de Baixo, Rogério da Silva hateten daudaun ne’e funsionáriu iha Suku Makadike de Baixo seidauk iha, nune’e durante ne’e autoridade tenke servisu mesak hodi atende komunidade.
“Ha’u mesak mak halo servisu. Ha’u sente sai difikuldade ba ha’u hala’o kna’ar atendimentu sira iha suku,” Rogério da Silva ba TATOLI iha Postu Uatulari, Tersa ne’e.
Aleinde ne’e, Xefe Suku Makadike Uaitame, José Pinto Soares haktuir funsionáriu suku seidauk iha, ne’ebé xefe suku mak tenke halai ba postu no halo atendimentu ba komunidade.
“Ha’u sente funsionáriu suku seidauk iha ne’e sai dezafiu ida ba ha’u. Tanba ne’e, ha’u hakarak rekomenda ba parte relevante liuliu Diresaun Munisipál Apoia Sosiedade Sivíl rekruta funsionáriu suku. Ami hahú simu pose iha fulan-Marsu 2025 to’o agora funsionáriu seidauk iha,” nia hato’o.
Iha fatin seluk, Administradór Postu Uatulari, Jorgé Ribeiro prefere Diresaun Servisu Munisipál Apoia Sosiedade Sivil aselera ona rekrutamentu funsionáriu suku hodi apoia ba xefe suku sira.
“Ha’u hanoin tenke aselera rekrutamentu ba funsionáriu ba Suku Makadike Uaitame no Makadike de Baixo hodi ajuda ita-nia xefe suku sira iha suku,” nia hato’o.
Funsionáriu suku ne’ebé koloka ba kada suku ida hamutuk na’in-haat kompostu husi servisu asuntu sosiál, finansa, sekretáriu no administrasaun.
Hatán ba preokupasaun funsionáriu suku ne’e, Diretór Servisu Munisipál Vikeke Apoiu Organizasaun Naun Governamental no Organizasaun Komunitáriu, Cosme Sarmento informa katak prosesu rekrutamentu ne’e besik realiza ona, tentativa entre fulan-Agustu no fulan-Setembru nia laran.
“Durante ne’e ita hein karta sirkulár husi Ministériu Administrasaun Estatál (MAE), tan ne’e mak prosesu rekrutamentu ne’e kle’ur. Maibé, karta sirkulár ne’e ami simu ona no sei distribui bá suku no administradór postu sira, ne’ebé prosesu rekrutamentu ne’e sei realiza iha fulan Agustu no Setembru. Iha karta sirkulár ne’e prosesu rekrutamentu ba funsionáriu na’in-haat ne’e sei realiza iha suku no ami akompaña de’it nia prosesu sira,” nia tenik.
Tuir dadus, Suku Makadike Uaitame hamutuk aldeia neen, totál uma-kain-340 no totál populasaun hamutuk na’in-899, enkuantu Suku Makadike de Baixo iha aldeia hitu, totál uma-kain 400 no totál populasaun hamutuk na’in-650.
Jornalista: Vitorino Lopez da Costa
Editór: Xisto Freitas da Piedade
