BOBONARU, 28 Jullu 2025 (TATOLI)—Xefe suku sira iha Postu Administrativu Maliana, Munisípiu Bobonaru husu ba Komandu Jerál Polísia Nasionál Timor-leste (PNTL) atu aumenta númeru Ofisiál Polísia Suku (OPS) tanba durante ne’e membru ida halo servisu dupla, la mantein servisu ho efetivu iha suku.
Rekomendasaun ne’e verbalmente líder komunitáriu sira hato’o durante halo diálogu komunitáriu ho Komandante Jerál Polísia Nasionál Timor-Leste (PNTL), Komisáriu Polísia Henrique da Costa, Segunda ne’e, iha Kuartél Komandu Polísia Autoridade Munisipál Bobonaru.
Xefe Suku Raifun, Domingos Salvador relata katak Komandu Polísia Eskuadra balun hanesan Eskuadra Maliana daudaun ne’e enfrenta problema limitasaun membru nune’e obrigatoriamente membru balun tenke dupla funsaun.
Tuir nia katak rekrutamentu kadete foun PNTL tinan 2025 la sufisiente atu koloka iha Komandu Eskuadra sira liuliu OPS.
“Agora atu rekruta ne’e 400. Ne’e la to’o. Se bele aumenta ba 1.000 ba leten. Ami preziza OPS tenke iha suku,” Domingos katak.
Aleinde ne’e, Xefe Suku Ritabou, Maximiano dos Santos Araújo reforsa katak Komandu PNTL presiza konsidera kestaun ne’e tanba membru OPS ida de’it, tan ne’e labele servisu kobre suku no aldeia hotu.
Maximiano mós husu ba Governu atu konstrui uma ba membru OPS iha kada suku nune’e bele halo atuasaun iha kualker tempu no oras bainhira kazu krime ruma akontese.
“Ha’u fó ezemplu iha ha’u-nia Suku Ritabou, Aldeia 12 kedas. Aldeia ida iha fronteira kedas ho Postu Bobonaru no ida ho Suku Hataz, Postu Administrativu Atabae. Tanba ne’e mak OPS ida de’it entaun labele kobre hotu. Kuandu problema akontese dala ida, ita labele atende hotu kedas tanba dook,” nia informa.
Nune’e mós, Xefe Suku Odomau, Cirílio Sirio Bere afirma atu garante situasaun hakmatek iha nivel suku, funsionamentu servisu OPS tenke másimu.
“Sira tenke halo vizita uma bá uma, halo aprosimasaun ba joventude para muda nia karater. Ne’e presiza polísia nia apoiu. Polísia ho nia funsaun barak-barak servisu ladún la’o. Realidade ha’u-nia OPS aleinde hanesan OPS, nia mós membru Eskuadra Maliana no hanesan mós kondutór. Okupa funsaun tolu kedas. Ida-ne’e ha’u hanoin presiza haree didi’ak,” Cirílio tenik.
Komandante Polísia Munisípiu Bobonaru, Superintendente Xefe Agustinho Gomes da Silva rekoñese problema ne’e akontese duni iha Komandu Eskuadra hotu-hotu iha Munisípiu Bobonaru.
“Ha’u fó ezemplu membru ida-ne’e, Inspetór Asistente Délio, nia ema ida de’it halo funsaun doubru hanesan Segundu Komandante Eskuadra Polísia Lolotoe, investigadór kazu no OPS,” nia haktuir.
Ba kestaun ne’e, Komandante Jerál PNTL, Komisáriu Henrique da Costa rekoñese problema limitasaun membru, tanba ne’e iha tempu badak Governu halo rekrutamentu ba membru PNTL hamutuk 400 hodi responde problema referidu ho fazeadamente.
“Se Governu iha kompromisu iha tinan 2025 hahú ho 400, 2026 rekruta tan 400, 2027 hamutuk 400 hanesan ne’e, ita kontente uitoan. ita-boot sira-nia mehi no komandu nia mehi ne’e bele hetan, tanba ami-nia planu ne’e kada suku ita tenke tau ema na’in tolu para servisu ne’e ida laiha ba mós na’in-rua seluk ne’e bele halo servisu. Ita-nia intensaun tau polísia iha suku hodi identifika problema no depois sira bele buka ligasaun hodi prevene problema iha-ne’ebá liuliu ajuda xefe suku sira rezolve problema,” nia esplika.
Kona-ba konstrusaun uma ba OPS sira, Komisáriu Henrique haktuir iha tinan entre 2013 ho 2014 Governu Nova Zelándia apoia instala uma ba OPS ne’ebé kada munisípiu uma ida, maibé programa ne’e projetu pilotu de’it no Governu Timor-Leste mak presiza kontinua.
Komandante ho diviza Fitun-rua ne’e konfirma daudaun ne’e ekipa Vise-Primeiru Ministru no Ministru Dezenvolvimentu Rurál no Abitasaun Komunitária, Mariano Assanami halo hela diskusaun ho PNTL atu konstrui fatin ba membru polísia iha bairu konstrusaun Uma Dignu.
Enkuantu, preokupasaun seluk ne’ebé liga ho desizaun nivel polítika, Komisáriu Henrique afirma nia parte sei enkamiña ba Governu hodi tau iha konsiderasaun hodi rezolve.
Jornalista: Sergio da Cruz
Editór: Xisto Freitas da Piedade
