DILI, 30 Jullu 2025 (TATOLI) – Ministériu Defeza Indonézia ofisialmente asina kontratu hodi sosa aviaun kombate nasionál (KAAN, sigla túrkia) ka aviaun funu nian hamutuk 48 husi Governu Túrkia.
Asinatura kontratu implementasaun entre reprezentante governu Indonézia no Túrkia asiste husi Ministru Defeza Indonézia, Sjafrie Sjamsoeddin durante Espozisaun Internasionál Defeza 2025 (IDEF) iha Istambul, Túrkia, iha loron-sábadu, 26 jullu liubá.
“Asinatura ne’e hanesan akompañamentu ida hosi akordu Governu ba Governu (G2G) ne’ebé asina ona antes iha loron 11 fulan-Juñu tinan 2025,” Brigadeiru Jenerál Frega Wenas Inkiriwang, Xefe Gabinete Informasaun no Komunikasaun husi Sekretariadu Jerál Ministériu Defeza nian, iha nota imprensa ida iha Jakarta, ne’ebé fó-sai husi Ajénsia Notisioza Antaranews, segunda ne’e.
Liuhusi kolaborasaun ida-ne’e, Indonézia sei hetan benefísiu lubuk ida, husi dezenvolvimentu indústria defeza doméstika to’o hasa’e kualidade rekursu umanu iha ámbitu teknolojia defeza nian.
Indonézia mós sei hetan benefísiu hosi ekipamentu defeza foun sira-ne’ebé sei hametin nia defeza aérea nian.
“Baze industriál lokál ne’ebé sei estabelese iha Indonézia hein katak sei sai evidénsia reál ba parséria ida-ne’ebé fó benefísiu ba malu bazea ba amizade,” Frega hateten.
Maibé, Frega la espesifika bainhira maka kontratu ne’e sei sai efetivu ka prazu ba aviaun ne’e atu to’o iha Indonézia.
Frega kontinua hodi esplika katak sosa ekipamentu defeza ne’e sei hametin relasaun militár entre Indonézia no Túrkia.
Nia mós espresa nia esperansa katak sei estabelese kooperasaun liután iha setór defeza nian ne’ebé sei fó benefísiu ba militár indonéziu no turku sira.
“Kolaborasaun ne’e entre Indonézia ho Túrkia iha setór defeza nian hatudu relasaun bilaterál ne’ebé maka’as entre nasaun rua, la’ós de’it iha diplomasia defeza nian maibé mós iha transferénsia teknolojia nian no hasa’e independénsia indústria defeza nasionál nian,” Frega konklui.
TATOLI
