DILI, 30 Jullu 2025 (TATOLI)—Komisaun Organizadora Liga Futsál Timor-Leste (LFTL) tempu besik sei lansa kompetisaun ne’ebé hanaran Kopa Futsál iha-ne’ebé sei envolve klube husi Primeira no Segunda Divizaun.
Prezidente Komisaun Organizadora LFTL, Frederico Martins ‘Asesu’ esplika planu kona-ba kompetisaun referida iha faze dezenvolve no bainhira finaliza sei hahú kompetisaun iha-ne’ebé kopa ne’e sei partisipa husi klube 23 kompostu husi Primeira Divizaun sanulu no Segunda Divizaun 13.
“Ita planeia ona maibé sei dezenvolve sistema. Kuandu hotu sei hahú kompetisaun Kopa Futsál,” Prezidente Komisaun organizadora LFTL, Frederico Martins ‘Asesu’ informa ba TATOLI iha Bairros dos Grilos, Kuarta ne’e.
Asesu salienta mezmu komisaun sei foku hela jogu kompetisaun entre klube sira iha Primeira no Segunda Divizaun ho objetivu atu hafásil ba ekipa téknika sira halo selesaun ba jogadór nasionál futsál.
Aleinde ne’e, komisaun hamutuk ho estrutura Asosiasaun Futsál Timor-Leste (AFTL) mós planeia atu loke kompetisaun Terseira Divizaun no Kopa Juvenil.
“Kompetisaun sira-ne’e ita hakarak iha selesaun jogadór ne’ebé orijinál maihosi duni kampu futsál tanba sai kritéru importante ba ekipa téknika selesaun nasionál futsál nian, ne’ebé sei maihosi rai-li’ur,” Asesu argumenta.
Entretantu, AFTL liuhosi Komisaun Organizadora LFTL rekoñese sei hasoru limitasaun kampu ba organiza kompetisaun futsál iha-ne’ebé provizoriamente sei utiliza kampu FALINTIL-FDTL Fatuhada, Dili.
Jornalista: Natalino Belo
Editór: Xisto Freitas da Piedade
