VIKEKE, 30 Jullu 2025 (TATOLI)—Xefe Suku Makadike Uaitame, Postu Administrativu Uatulari, Munisípiu Vikeke, José Pinto Soares solisita Servisu Saúde Munisípiu (SSM) Vikeke koloka pesoál saúde iha Suku Makadike Uaitame hodi fó atendimentu ba komunidade.
“Ami-nia suku iha área rurál dook husi sentru saúde no fasilidade saúde sira, nune’e problema ne’ebé ha’u-nia komunidade hasoru mak saúde. Tan ne’e, ha’u husu ba servisu saúde munisípiu koloka pesoál saúde mai ami-nia suku hodi fó tratamentu ba komunidade ne’ebé moras,” José Pinto ba TATOLI iha Postu Vikeke Vila, Kuarta ne’e.
Autoridade ne’e haktuir katak preokupasaun kona-ba saúde nian ne’e hato’o ona ba Servisu Saúde Munisípiu maibé seidauk koloka pesoál bá suku Makadike Uaitame.
“Ami-nia preokupasaun ne’e hato’o ona ba servisu saúde munisípiu. To’o agora seidauk koloka pesoál saúde ba ami-nia suku. Durante ne’e, ami-nia komunidade moras tenke ba postu saúde Laisorulai, Munisípiu Baukau ho distánsia kilómetru tolu (3). Dalaruma ba Postu Saúde Sana, Suku Uaitame, Postu Uatulari, ida-ne’e mós kilómetru tolu hofoin asesu ba fasilidade saúde. Postu rua ne’e distánsia dook maibé ha’u-nia komunidade pasiénsia la’o,” nia relata.
Tanba ne’e, José informa, postu saúde ba suku Makadike Uaitame nian konstruidu ona iha área Bubulita, iha-ne’ebé daudaun ne’e atinje ona 90%, la kle’ur finalizadu ona, ne’ebé molok finaliza koloka pesoál saúde hodi fó asisténsia saúde ba komunidade.
Hatán ba preokupasaun ne’e, Reprezentante Diretór Servisu Saúde Munisípiu Vikeke, Fernando Soares haktuir katak kona-ba preokupasaun Suku Makadike Uaitame nian, kolokasaun pesoál saúde preprada, hein postu saúde finaliza mak foin koloka ba área ne’ebá.
“Pesoál saúde ba Suku Makadike Uaitame ne’e na’in-rua. Agora daudaun sei iha Sentru Saúde Uatulari. Ita hein de’it bainhira mak sira-nia konstrusaun postu saúde ramata mak ami koordena fali ho Xefe Sentru Saúde Uatulari hodi koloka pesoál saúde bá Postu Saúde Makadike Uaitame hodi fó atendimentu ba komunidade,” nia hato’o.
Tuir dadus, Suku Makadike Uaitame hamutuk aldeia neen, totál uma-kain-340 no totál populasaun hamutuk na’in-899.
Jornalista: Vitorino Lopez da Costa
Editór: Xisto Freitas da Piedade
