VIKEKE, 30 Jullu 2025 (TATOLI)—Xefe Suku Laline, Postu Administrativu Lakluta, Munisípiu Vikeke, Zaquiel de Cavalho informa katak projetu dada bee-moos husi Programa Nasionál Dezenvolvimentu Suku (PNDS) tinan 2025 iha Suku Laline seidauk implementadu tanba klima (udan) difikulta transporte lori materiál konstrusaun.
“Foin lalais mak fornesedór sira distribui materiál fabrikadu ba fatin kontrusaun. Loloos ne’e ami implementa ona iha fulan-Juñu liubá, maibé kondisaun estrada aat no udan nune’e karreta labele distribui materiál konstrusaun bá ami-nia suku,” Xefe Suku Laline ba TATOLI iha Postu Lakluta, Kuarta ne’e.
Nia hatutan projetu dada bee-moos sei implementa iha iha fulan-Agustu tanba materiál lokál no materiál fabrikadu daudaun iha ona fatin konstrusaun, hein implementa servisu.
“Ami sei implementa iha fulan-Agustu nian laran, tanba foin lalais mak udan para. Ha’u sente ami-nia obra ne’e sei finaliza tarde no sei difikulta progresu maibé ami sei esforsa aan atu finaliza,” Zaquiel informa.
Projetu bee-moos iha Suku Laline uza sistema gravitasaun, sei gasta orsamentu hamutuk $25.945,13, ho durasaun konstrusaun fulan-tolu, sei benefísia uma-kain 136, ho totál populasaun na’in-431.
Entretantu, obra PNDS ba tinan 2025 totál hamutuk 40 ne’ebé implementa iha suku 36, no obra referida Autoridade Munisípiu Vikeke lansa ba nivel munisípiu iha fulan-Juñu ho durasaun konstrusaun fulan-tolu
Jornalista: Vitorino Lopez da Costa
Editór: Xisto Freitas da Piedade
