DILI, 30 Jullu 2025 (TATOLI)—Ekipa futeból Ramelau FC provizoriamente lidera klasifikasaun dahuluk iha tabela Primeiru Divizaun Liga Futsál Timor-Leste.
Ekipa Ramelau FC rekolla pontu 3 hafoin iha durante jogu jornada dahuluk halakon ekipa Mauputar FC no jornada daruak halakon Boa Sorte FC nune’e rekolla pontu neen, kolesaun golu (GF) hitu, menus golu (GA) ida ho valór golu (GD) neen.
“Jogu foin jornada daruak, maibé provizoriamente Ramelau Fc mak okupa iha klasifikasaun dahuluk,” Prezidente Komisaun organizadora LFTL, Frederico Martins ‘Asesu’ informa ba TATOLI iha Bairro dos Grilos, Kuarta ne’e.
Asesu relata katak Primeira Divizaun LFTL envolve klube sanulu (10) ho sistema full kompetisaun iha-ne’ebé kada klube sei jogu home an away no tuir kalendáriu primeiru volta sei ramata iha fulan-Setembru inklui kontinua segunda volta no sei termina iha fulan-Novembru.
Komisaun Organizadora ba LFTL rasik sei fó oportunidade ba kada klube sira halo rekrutamentu ka kontrata jogadór sira iha-ne’ebé tuir planu sei loke janela transferénsia iha primeira volta ramata nune’e bainhira jogu animu liután bainhira kontinua ba segunda volta.
“Klube seluk hahú hatudu ánimu liuhosi mudansa jogu. Espera kompetisaun ne’e sei kompetitivu to’o kompetisaun ramata,” Asesu akresenta.
Klube sira-ne’ebé kompete iha LFTL, bainhira rekolla pontu barak liu sei sai kampiaun no ekipa haat iha tabela klasifikasaun ikus sei elemina ba segunda desizaun.
Entretantu, klube sanulu ne’ebé kompete iha Primeira Divizaun LFTL kompostu husi Mauputar Fc, Ramelau Fc, Caesar Dante, Musila, São Francisco Xavier FC, AD. Samoro, Boa Sorte, Gamer, Santa Cruz Fc, Coelho FC.
Jornalista: Natalino Belo
Editór: Xisto Freitas da Piedade
