DILI, 31 Jullu 2025 (TATOLI) – Dezentralizasaun administrativa no podér lokál parte ida atu lori serbisu públiku husi Governu sentrál hakbesik ba povu iha baze no fó kompeténsia ba munisípiu sira hodi bele hala’o dezenvolvimentu.
Tanba ne’e, Xefe Bankada KHUNTO, António Verdial de Sousa, admite katak dezde uluk esperansa povu nian ba podér ne’e tenke fó ba kraik, maibé to’o daudaun nafatin sentraliza iha nivel nasionál de’it.
Tuir nia, desentralizasaun administrativa no podér lokál ninia objetivu prinisipál mak fó transferénsia podér no responsabilidade ba baze, promove partisipasaun sidadaun, dezenvolvimentu sosiál no ekonomia no harii Estadu ne’ebé forte.
Nia salienta, kondisaun mínima hanesan rekursu umanu, infraestrutura no seluk tan husi munisípiu balun hanesan Bobonaru, Baukau no seluk tan preparadu ona atu simu podér lokál ne’e husi Governu sentrál.
“Agora, vontade polítika Governu sentrál fó ona ba munísipiu sira tenke aselera”, nia hato’o.
Tanba bainhira podér ne’e fó ba kraik sei hamosu benefísiu xave mak munisípiu ne’e hetan iha parte dezenvolvimentu lokál, partisipasaun sidadaun no presta serbisu públiku ida di’ak liután.
Vise-Prezidente Komisaun A ba Asuntu Konstituisionál no Justisa ne’e deskreve liuhusi podér lokál munisípiu sira bele determina no implementa programa ne’ebé adekuadu ba sira-nia kondisaun lokál hodi aumenta dezenvolvimentu sosiál no ekonómiku rasik.
Ba partisipasaun Governu lokál bele fó oportunidade ba sidadaun sira, atu hola desizaun hodi kria prosesu dezenvolvimentu ne’ebé inkluzivu, nune’e serbisu públiku munisípiu sira bele oferese ho efisiente. “Inklui iha setór saúde, edukasaun no infraestrutura bázika ba komunidade”, nia hateten.
Jornalista: Nelson de Sousa
Editora: Maria Auxiliadora
