Kooperativa no grupu hamutuk hitu asesu ba orsamentu subvensaun públika husi SEKOOP
VIKEKE, 31 Jullu 2025 (TATOLI)—Koordendór Sekretaria Estadu Kooperativa (SEKOOP) Munisípiu Vikeke, Albino da Costa Guterres informa katak iha tinan 2025 kooperativa no grupu sira iha Munisípiu Vikeke hamutuk hitu (7) mak asesu ba orsamentu subvensaun públika husi SEKOOP.
“Iha tinan ida-ne’e SEKOOP loke oportunidade ba kooperativa no grupu sira hodi hatama proposta ba SEKOOP hodi asesu orsamentu subvensaun públika ne’ebé SEKOOP oferese. Husi orsamentu subvensaun públika ne’e, agora daudaun ita Vikeke iha kooperativa no grupu hitu mak asesu ba orsamentu referidu,” Albino da Costa Guterres ba TATOLI iha Postu Vikeke Vila, Kinta ne’e.
Kordenadór SEKOOP ne’e aprofunda orsamentu subvensaun públika ne’ebé grupu no kooperativa asesu maioria orientada ba área agrikultura nian hanesan kuda hudi, haki’ak fahi, ikan, haki’ak karau, kuda modo no seluk tan.
“Ami haree benefisiáriu sira husi Munisípiu Vikeke implementa ona sira-nia atividade no bá-oin ami nafatin akompaña sira-nia atividade, inklui akomapaña sira kona-ba prosesu halo relatóriu tanba kada fulan benefisiáriu hato’o sira-nia relatóriu atividade nian ba SEKOOP nasionál,” haktuir.
Nia relata benefisiáriu hitu ne’e maihusi Postu Vikeke Vila, Postu Ossú no Postu Lakluta, iha-ne’ebé Postu Vikeke Vila kompostu husi Federasaun Multicooperativa (Femulcow), Suku Bahalaraua’in hetan fundu $7.000, Asosiasaun Serbi Nodi Moris (ASM), Suku Luka hetan fundu $7.000, Grupu Hisik Kosar ba Moris Di’ak, Suku Bibleo hetan $3.000, Grupu Habokur Karau iha Suku Bahalaraua’in hetan $4.000. Husi Postu Lakluta, Grupu Habokur Karau iha Aldeia Halimean, Suku Ahic hetan $3.000. Enkuantu, Postu Ossú, Suku Loihuno, kompostu Grupu Lia Wai Oli iha área aguakultura ikan hetan fundu $3.000.
Iha fatin ketak, Prezidente Kooperativa Kréditu Uniaun Builale, Jacinta Ximenes haktuir orsamentu subvensaun públika ne’ebé Kooperativa Kréditu Uniaun Builale hetan hamutuk $5.000.00, hodi benefisia atividade ortikultura no aguakultura.
Tuir dadus, membru Kooperativa Kréditu Uniaun Builale totál hamutuk na’in-200 ne’ebé ativu iha kooperativa hodi implementa atividade agrikultura.
Jornalista: Vitorino Lopez da Costa
Editór: Xisto Freitas da Piedade
