VIKEKE, 31 Jullu 2025 (TATOLI)—Koordenadór Sukursál Servisu Rejistu no Verifikasaun Emprezariál, Institutu Públiku (SERVE, I.P.) Munisípiu Vikeke, Filomeno Sequeira da Silva Amaral informa hahú husi fulan-Janeiru to’o fulan-Juñu tinan ne’e SERVE konsege rekolla taxa hamutuk $9.695,56 ba kofre Estadu.
“Durante fulan-neen ami konsege rekolla taxa hamutuk $9.695.56. Taxa hirak-ne’e husi ita-nia empreza sira-ne’ebé rejistu foun no renovasaun dokumentu iha SERVE Munisípiu Vikeke,” Filomeno informa ba TATOLI iha ninia kna’ar fatin, Kinta ne’e.
Koordenadór SERVE hatutan empreza sira-ne’ebé halo moris CRC (Certidão do Registo Comercial) selu kustu $10, atividade seluk kona-ba sujeita hanesan ofisina, karpinteiru, restorante selu $60, maibé atividade ba naun sujeita hanesan fa’an roupa, kioske no accessories karreta no motorizada la selu, kuandu aumenta atividade no muda fatin selu $5.
Kona-ba dezafiu, nia dehan, durante ne’e sukursál SERVE hasoru problema mak laiha edifísiu própriu no menus rekursu umanu ba atendimentu kliente.
“Dezafiu ne’ebé durante ne’e ami hasoru mak edifísiu tanba edifísiu ne’ebé agora daudaun ami uza ne’e aluger. Funsionáriu agora ami na’in-hitu (7) de’it, ne’ebé ami servisu dupla. Tan ne’e, presiza aumenta. Problema sira-ne’e ami aprezenta ona SERVE nasionál maibé seidauk iha resposta. Ami hakarak aumenta funsionáriu na’in-lima (5) hanesan administrasaun, finansa, lojístika, kliner no jardineiru,” nia hato’o.
Tuir dadus, empreza sira-ne’ebé rejistadu iha sukursál SERVE Vikeke mak hanesan novu rejistu hamutuk 285, kompostu husi Enin 169, Unipessoal 108, Lda 8 no alterasaun hamutuk 93 kompostu husi Enin 61, Unipessoal 30 no Lda 2, ho totál hamutuk 522.
Jornalista: Vitorino Lopez da Costa
Editór: Xisto Freitas da Piedade
