PM no Embaixadór João Câmara diskute prioridade kooperasaun ho Laos
DILI, 01 Agostu 2025 (TATOLI) – Embaixadór Timor-Leste ba Laos, João Freitas de Câmara, hasoru malu ho Primeiru-Ministru (PM), Xanana Gusmão, hodi simu orientasaun molok hala’o misaun nu’uda diplomata iha Repúblika Demokrátika iha Laos.
Nia esplika iha sorumutu ho Primeiru-Ministru ne’e atu haree hamutuk prioridade kooperasaun saida mak presiza estabelese ho Laos.
“Ha’u presiza hasoru-malu ho Primeiru-Ministru no ministru sira seluk atu identifika ita-nia nesesidade no interese ruma iha área saida de’it mak bele aborda hodi estabelese kooperasaun ho Laos. Liuliu kona-ba akordu kooperasaun bilaterál sira ne’ebé mak ita iha no buka atu identifika tan prioridade foun sira”, João Câmara hateten, iha Palásiu Governu, ohin.
Nia mós agradese ba konfiansa husi Xefe Governu, nomós simu orientasaun molok hala’o missaun durante reprezenta Estadu Timor-Leste iha Laos. PM fó sujestaun aleinde serbisu hamutuk ho Laos, buka mós halo koordenasaun ho embaixadór sira seluk iha nasaun membru ASEAN, buka atu habelár kona-ba pás no estabilibdade iha rejiaun ne’e.
Lembra katak, João Freitas de Câmara simu pose nu’udár Embaixadór Estraordináriu no Plenipotensiáriu ba Repúblika Demokrátika Populár Laos iha 29 Jullu 2025.
Tuir planu, Embaixadór Câmara sei bá Laos hodi hahú misaun diplomátika iha fulan ida-ne’e nia rohan.
Notísia relevante : https://tatoli.tl/2025/07/29/horta-fo-pose-ba-lurdes-bessa-joao-camara-sai-embaixador-tl-ba-beljika-laos/
TATOLI
